بغدادینین کؤمکچی‌سی یاخالاندی

داعشین اؤلدوروله‌ن لیدئری ابو بکر البغدادی‌نین کؤمک‌چی‌سی ابو خلدون لقب‌لی تروریست کرکوک‌ده یاخالاندی.

 عراق اوردوسونا باغلی گوونلیک مئدیا حجره‌سی طرفین‌دن وئریله‌ن آچیقلامادا، آلینان بیر استخباراتی دگرلندیره‌ن پلیسلرین، کرکوکون حویجه قصبه‌سین‌ده بیر ائوه تشکیل ائتدیگی باسقیندا بغدادی‌نین کؤمک‌چی‌سی ابو خلدونو یاخالادیغی بیلدیریلدی.

آچیقلامادا، شعلان عبید آدلی ساختا بیر کیملیک داشییان ابو خلدونون هم بغدادی‌نین کؤمکچیلیگینی ائتدیگی هم ده صلاح‌الدین ویلایتینین حربی باشچیسی وظیفه‌سین‌ده اولدوغو ایفاده ائدیلدی. داعش ترور هؤرگوتونون لیدئری ابو بکر البغدادی، اکتبر آیین‌دا سوریه‌نین قوزئیینده‌کی ادلب شهری اطرافیندا بیر ائوه تشکیل ائدیله‌ن عملیات‌دا اؤلدورولموشدو.

عراق مقاملاری دسامبر ۲۰۱۷ ده وئردیکلری آچیقلامادا، اؤلکه تورپاقلارینین داعشین الین‌دن قورتاریلدیغینی بیلدیرمیشدی.

یاتان حجره‌لره صاحب ترور هؤرگوتو، صلاح‌الدین، کرکوک و دیاله ویلایتلرینین بیرلشدیگی اؤلوم اوچ‌بوجاغی اولاراق آدلاندیریلان بؤلگه‌ده زامان زامان ترور سالدیریلاری تشکیل ائدیر.