"ترور هؤرگوتلرینین مرکزی اولابیلر"
لاوروو: افغانیستانین قوزئیی، ترور هؤرگوتو داعشین لیدئرلیگینده اولوسلارآراسی ترور هؤرگوتلرینین اؤنملی مرکزی حالینا چئوریلمه ریسکی داشیییر
روسیا خاریجی ایشلر باخانی سئرگی لاوروو، افغانیستانین قوزئینین، ترور هؤرگوتو داعشین لیدئرلیگینده اولوسلارآراسی ترور هؤرگوتلرینین اؤنملی مرکزی حالینا چئوریلمه ریسکی داشیدیغینی سؤیلهدی.
لاوروو، دونن آمریکا بیرلشمیش دؤولتلرینین نیویورک شهرینده بیرلشمیش میللتلر گوونلیک شوراسینین توپلانتیسیندا ائتدیگی چیخیشیندا، دونیادا تروریزم پروبلئمینه توخوندو.
داعش و القاعده ترور هؤرگوتلرینین دونیا میقیاسیندا ییخیم و دهشت ساچماغا داوام ائتدیگینی بیلدیرهن لاوروو،
"تروریستلرین ائیلملرینین نتیجهسی اولاراق، سوریه و عراق داخیل اولماقلا، اورتا دوغوداکی وضعیت اولدوقجا قایغی وئریجی اولماغا داوام ائدیر. اورادان چیخان ترور تهدیدی، لیبی ده داخیل اولماقلا آفریقا قارهسینده سرعتله یاییلدی. اورتا آسیا، گونئی و گونئی دوغو آسیا دا انسانلیق دیشی ترور ائیلملرینه صحنه اولور" ایفادهلرینی ایشلتدی.
لاوروو، افغانیستانین قوزئینین ترور هؤرگوتلرینین یوواسی حالینا گلمه ریسکی اولدوغونا ایشاره ائدرک،
"کولکتیف گوونلیک آنلاشماسی هؤرگوتو و شانگهای امکداشلیق هؤرگوتو، اورتا آسیا داخیل افغانیستانداکی تهدیدلره متمرکز اولماقدادیر. افغانیستانین قوزئیی، ترور هؤرگوتو داعشین لیدئرلیگینده اولوسلارآراسی ترور هؤرگوتلرینین اؤنملی مرکزی حالینا چئوریلمه ریسکی داشیییر" دئدی.
بو تهدید و چتینلیکلرین عهدهسیندن گلمک اوچون افغانیستانا اویغون خاریجی یاردیم لازیم اولدوغونو وورغولایان لاوروو، اورتا آسیا ایله افغانیستان آراسیندا اقتصادی امکداشلیغین گلیشدیریلمهسی پلانلارینین، بو اؤلکهلردهکی ترور تهدیدینین اورتادان قالدیریلمادان تطبیق اولونمایاجاغینی قید ائتدی.