ظریف: آمریکا دونیانی ایداره ائده‌بیلمز
"عراقدا یوکسک سویه‌لی مقاملار بیزیمله امکداش‌لیق ائتمک‌ده قرارلی آنجاق..."
ایران خاریجی ایشلر باخانیی محمد جواد ظریف، آمریکا بیرلشمیش دؤولتلرینین دونیانی ایداره ائده‌ممه‌یه‌جگینی سؤیله‌دی.
اؤلکه‌سینین عراقین کربلا شهرین‌ده‌کی کونسوللوغون‌دا ائدیلن بیر توپلانتیدا دانیشان ظریف،
"عراقدا یوکسک سویه‌لی مقاملار بیزیمله امکداش‌لیق ائتمک‌ده قرارلی آنجاق آلت و یا یئرلی سویه‌ده‌کی مقاملار، آمریکا هژمونیسین‌دن قورخدوقلاری اوچون بونو قبول ائتمیر" دئدی.
آلت سویه مقاملارین، عراقا گئدرک یاتیریملارینا باشلاماماسی اوچون ایران‌لی بیر شیرکته بانک تضمیناتی وئریلمه‌سینه مانع اولدوغونو ایفاده ائد‌ن ظریف، ایران‌دان وارد ائدیله‌ن سیمانا تطبیق اولونان گؤمروک وئرگی‌سینین، بیرلشمیش عرب امیرلیکلرین‌دن وارد ائدیله‌ن سیمانا تطبیق اولونان‌دان داها یوکسک اولدوغونا ایشاره ائتدی.
واشینگتون رهبرلیگینین، ایرانا تطبیق ائتدیگی تحریملردن هئچ بیر شئی الده ائده‌بیلمه‌یه‌جگینی دئیه‌ن ظریف،
"آمریکا رهبرلیگینین اؤزو، بو مسئله‌ده ۷ میلیارد دلار خرجلدیگینی و هئچ بیر قازانیم الده ائتمه‌دیگینی اعتراف ائتدی. آمریکا دونیانی ایداره ائده‌بیلمز. بو حقیقت اوزرین‌دن حرکت ائتمه‌لی‌ییک" دئیه دانیشدی.
ظریف، ۴ گونلوک سفر چرچیوه‌سین‌ده بازار گونو گئتدیگی بغداددا عراق باشباخانی عادل عبدالمهدی، مجلس باشقانی محمد الحلبوسی و خاریجی ایشلر باخانی محمد الحکیم ایله اؤنجه‌کی گون ده اربیل‌ده عراق کورد بؤلگه‌سل رهبرلیگی باشباخانی نچیروان بارزانی و مسعود بارزانی ایله بیر آرایا گلمیشدی.
