آمریکا و ایران یمن موضوعسوندا گیزلی گؤروشدوگو ادعاسی
ایران و آمریکا دیپلوماتلاری ادعا ائدیلن یمنده باش وئرن بحران حاقیندا اینگیلترهنین پایتختی لندنده گیزلی گؤروش کئچیردی
![آمریکا و ایران یمن موضوعسوندا گیزلی گؤروشدوگو ادعاسی](http://cdn.trt.net.tr/images/xlarge/rectangle/f509/4582/f6d6/5c1f53b64492b.jpg?time=1718937389)
ایران و آمریکا دیپلوماتلاری ادعا ائدیلن یمنده باش وئرن بحران حاقیندا اینگیلترهنین پایتختی لندنده گیزلی گؤروش کئچیردی.
کویتین الجریده قزئتینین آوروپالی اوست سویه بیر دیپلوماتا ایستینادن خبرینه گؤره، ایران و آمریکالی دیپلوماتلار، آوروپا و عمانین آرا بولوجولوغوندا لندندکی بیر اوتلده گیزلیجه بیر آرایا گلدی.
آدی آچیقلانمایان آوروپالی اوست سویه دیپلومات، ایران و آمریکالی دیپلوماتلارین گؤروشمهسینین مطبوعاتا سیزماماسی اوچون دیپلوماتیک پاسپورتلار یئرینه ال پاسپورتلا گئتدیکلری لندنده، قالدیقلاری اوتلین بیر اوتاغیندا "چوخ گیزلی" گؤروشمه ائتدیکلرینی سؤیلهدی.
گؤروشمهنین زامانی حاقیندا معلومات وئرمهین آوروپالی دیپلومات، سوئدین باشکندی ایستوکهولمدا بیرلشمیش میللتلر (بمت) قورولوندا رئاللاشان یمنده ساواشان طرفلر آراسینداکی موذاکیرهلرین بو گؤروشمه سایهسینده رئاللاشدیغینی ایفاده ائتدی.
گؤروشمهده ایران طرفینین، حوثیلرین سوئددکی موذاکیرهلره قاتیلماسی و بعضی مسئلهلردن ایمتیناع ائدجگینین ضمانتینی وئردیگینی کؤچورن آوروپالی دیپلومات، آمریکا ساوونما ناظیری جیمز متیسین یمن موذاکیرهلرینی بیر آی اوّلدن خبر وئرمهسینین بو گؤروشمهنین نتیجهسی اولدوغونو ادعا ائتدی.
آوروپا دیپلومات،
"ایرانین یمن موضوعسونداکی مثبت آددیملاری، آمریکا-نین تهرانلا علاقهلریندکی موقعیتینی یوموشاتماسینی تامین ائتدی. واشینگتون بونون نتیجهسینده ده ایرانین نفت ایخراج ائتدیگی اؤلکهلره (180 گونلوک) معافیت تامین ائدهرک، تحریملرین شدتینی آزالتدی. آوروپا، ایراندان سوریه بحرانیندا دا، عینی یاناشما گؤسترمگی و اولوسلار آراسی توپلوم ایله امکداشلیق ائتمگی گؤزلییر. " دئدی.
گؤروشمهده آمریکانین تهرانا قارشی تحریملرینین دا گؤروشولدوغونو سؤیلهین دیپلومات، ایرانین آمریکادان تحریملری تاخیره آلماسی و معافیت مدتلرینی اوزاتماسی طلب اولدوغونو و بو شرطلرین قبول ائدیلممهسی حالیندا واشینگتون رهبرلیگی ایله ایرتیباط کاناللارینی باغلاما تهدیدینده اولدوغونو ایفاده ائتدی.
سؤز موضوعسو دیپلومات هینی زاماندا، ایران و آمریکانین موذاکیره ماساسینا قاییتماق اوچون بیر-بیرلرینه قارشی ادعا ائتدیکلری شرطلری روحانی و ترامپین ایچ سیاستده پروبلملرله قارشیلاشماماسی اوچون رسمی آچیقلاما اولمادان تطبیق موضوعسوندا آوروپالی آرابولوجولار طرفیندن قانع ائدیلدیگینی ادعا ائتدی.
ایرانین لندندکی سفیری حمید بایدینژاد، ایران و آمریکا دیپلوماتلارینین گیزلی شکیلده لندنده گؤروشدوگو ادعالارینی رد ائتدی.
بایدینژاد، اجتماعی مئدیا حسابیندان ائتدیگی آچیقلامادا، بو ایستیقامتدکی خبرلرین "یالنیز بیر سهودن عبارتدیر" اولدوغونو سؤیلهیرک تامامیله رد ائتدی.