روسیا، سوریه‌یه اس-۳۰۰ گؤندردی
"عسگرلریمیزین تهلوکسیزلیگینی یوزده یوز تامین ائدجییک"
روسیا خاریجی ایشلر باخانی سئرگئی لاوروو، سوریه‌ده روس حربی اوچاغینین دوشمه‌سی سونراسی بو اؤلکه‌یه اس-۳۰۰ هاوا ساوونما سیستمی داشینماسینین باشلادیغینی بیلدیردی.
لاوروو، نیویورک‌دا بیرلشمیش میلتلر تشکیلاتینین ۷۳.جو باش قورولو توپلانیلاریندا ائتدیگی دانیشمانین آردیندان دوزنله‌دیگی مطبوعات کنفران‌سین‌دا گوند‌مه دایر سواللاری جاوابلاندیردی.
سوچی آنلاشماسی و ترور هؤرگوتو النصره عضولرینین ادلبدن نئجه آیریلاجاغینا دایر بیر سوالا لاوروو بئله جاواب وئردی:
"میلیتانلار و آغیر سلاحلار، ادلبده سلاحلاردان آریندیریلمیش بؤلگه‌دن باشقا یئرلره ترانسفر ائدیلیر. تورکیه سیاسی پروسه‌ده ایشتیراک ائد‌جک مخالیفلری النصره‌دن آییرما مسئولیتینی آلدی. بو، آسان بیر ایش دئییل. اوباما رهبرلیگی بیزه بیر نئچه دفعه سؤز وئردی، ائده‌بیلمه‌دی، مؤوجود یؤنتیم ده ائده‌بیلمه‌دی. تورکیه‌نین معتدل مخالیفلری النصره‌دن آییرماسینی اومود ائدیریک.
سوریه‌ده، روسیا، تورکیه و ایران "یوزده یوز همفیکیر" اولماسا دا، ترورلا مباریزه و سوریه‌نین بوتؤولویو مسئله‌سین‌ده بیرلیک اولدوقلارینی بیلدیر‌ن لاوروو، آستانا امکداش‌لیق گؤروشمه‌لرینین سون درجه فایدالی اولدوغونو قید ائتدی.
سوریه‌ده ترورلا مباریزه ائدرکن، آمریکا رهبرلیگی آلتین‌داکی کوالیسیون گوج‌لرینین عملیاتلار گئچیردیگی رقه‌ده باش وئره‌نلرین اولماسینا ایجازه وئرمه‌یه‌جکلرینی بیلدیر‌ن لاوروو،
"یوزلرجه، مینلرجه سوریه‌لی حلبه، دوغو غوطه‌یه قاییتمایا باشلادی". دئدی.
لاوروو، سوریه‌ده روس اوچاغینین وورولما‌سینین آردیندان، اس-۳۰۰ هاوا ساوونما سیستمی داشینماسینین باشلادیغینی آچیقلادی و
"عسگرلریمیزین تهلوکسیزلیگینی یوزده یوز تامین ائدجییک" دئدی.
