آمریکا نماینده‌لر مجلیسی ایران انرژی صنایعسیندکی تحریم‌لرینی 10 ایل داها اوزاددی

آمریکا نماینده‌لر مجلیسینده انرژی صنایعسی ایله باغلی ایرانا یؤنلیک بعضی تحریم‌لرین 10 ایل داها اوزادیلماسینی نظرده توتان قانون لاییحه‌سی اکثریت رای ایله قبول ائدیله‌رک سناتویا گؤندریلیب.

نماینده‌لر مجلیسی همچین‌ین، سوریه حکومتینه و دستکچی‌لرینه "ساواش جینایت‌لری" چرچیوه‌سینده تحریم نظرده توتان لاییحه‌نی ده قبول ائتدی.

سناتودا دا قبول ائدیلمه‌سی لازیم اولان و آمریکانین ایلک اولا‌راق 1996-جی ایلده ایجرایه سوخدوغو "ایران تحریم‌لار یاساسی"، موجود پرزیدنت باراک اوباما طرفین‌دن ایمضالاندیغی زامان یاسالاشاراق 2026-جی ایله قدر ایجرایه‌دا قالماغی گارانتیلمیش اولا‌جاق.

ایرانین نوکلئر سیلاح صاحبی اولماسینی مانع تؤرتمه‌یه یؤنلیک سؤز موضوعسو قانون، بو اؤلکه‌نین انرژی صنایعسینه محدودیت‌لر و تحریم‌لر ایچه‌ریر.

دیگر طرف‌دن، سوریه حکوتینه تحریم قانون لاییحه‌سی‌نین ده قانونلاشماسی اوچون سناتودا قبول ائدیلمه‌سی و اوباما طرفین‌دن ایمضلانماسی لازیم‌دیر.

2015-جی ایلین ژوئیه آییندا ایران ایله بیرلشمیش میللت‌لر تشکیلاتی‌نین امنیت شوراسی‌نین دایمی عضو‌لری آمریکا، روسیا فدراسیونو، چین خالق جمهمریتی، فرانسا و اینگیلتره ایله آلمانیا‌دان عبارت اولان 5 + 1 اؤلکه‌لری آراسیندا الده ائدیلن "نوکلئر راضیلاشما" ایله ایران، نوکلئر پروقرامینی آنلاشمایا گؤره اهمیت‌لی اؤلچوده مینیمیزه ائده‌جک، قارشیلیغیندا دا تحریم‌لر آزالدیلاجاقدیر.

8  نوامبرداکی پرزیدنت سئچیم‌لری قازانان دونالد ترامپ، بیر چوخ دفعه "ایرانلا نوکلئر آنلاشمایا قارشی اولدوغونو" دیله گتیرمیشدی.

ترامپین 20 ژانویه 2017ده وظیفه‌سینه باشلاماسین‌دان سونرا ایران موضوعسونو باشکند واشینگتونون اساس گوندم ماده‌لری آراسینا سوخماسی گؤزلنیلیر.