موصولدا ترور تشکیلاتی داعش قتل عام ائدیب

عراقین ایکینجی بؤیوک شهری موصولو ترور تشکیلاتی داعشدن قورتارما عملیات‌لاری بیرینجی هفته‌سینی دولدورارکن تشکیلاتین، شهرده اونلارین صف‌لرینده ووروشمایان 200 آدامی اؤلدوردوگو ادعا ائدیلدی.

نینوا میللت وکیلی انتصار الجبوری، سون بیر نئچه گون ایچری‌سینده، داعش طرفینده ساواشمانی رد ائدن 200 نفرین، تریستلرجه اؤلدورولدوگونو آچیقلادی.

الجبوری، اعدام‌لار موصولون موختلیف بؤلگه‌لرینده ائدیلدیگینی و جنازه‌لرین عائله‌لرینه تسلیم ائدیلمدیگینی سؤیله‌دی.

آمریکان سی. ان. ان اینترناسیونال کانا‌لی دا، داعشین دونن موصولدا 284 نفری اؤلدوردوگونو ائشیتدیرمیشدی.

خبرده، بولدوزرلرله توپ‌لو مزارلارا باس‌دیریلان قوربان‌لار آراسیندا اوشاق‌لارین دا اولدوغو قید ائدیلدی.

بیرلشمیش میللت‌لر تشکیلاتی‌نین اینسان حاق‌لاری مسئول‌لار‌ی ده اوّلکی گون، داعش تروریست‌لری‌نین، موصولون کندلرین‌دن، ان آز 550 عائله‌نی جان‌لی قالخان کیمی ایستیفاده ائتمک اوچون اؤز کونتروللریندکی بؤلگه‌لره آپاردیغینی آچیقلامیشدی.

بو آرادا موسولو ترور تشکیلاتی داعشدن قورتارما عملیاتی‌نین 8-جی گونونده عراق اوردوسو، کایارا منطقه‌سی اطرافیندا اولان 9 کندی تروریست‌لردن قورتاردی.

ایجرا ائدیلن عملیات‌لار اثناسیندا، داعش عضوو 299 تروریست اؤلدورولدو، بومبا یوک‌لو 20 ماشین ایله 45 بومبا دا یوخ ائدیلدی.

موصولون ترور تشکیلاتی داعشدن تمیزلنمه‌سی اوچون، عراق اوردو بیرلیک‌لری، پئشمرگه گوجلری و بؤیوک اکثریتینی بعشیقه کامپینداکی تورک عسگرلری‌نین اؤیرتدیگی نینوا موجاهیدلری، 17 اوکتوبردا عملیات باشلاتمیشدی.

دیگر طرف‌دن، کرکوک سالدیریسینی پلان‌لاش‌دیران داعش‌لی تروریست ابو ایسلام انصاری کود آدلی مزین نزها محمد العابدی الریا‌سیز توتولدو.

عراق کورد بؤلگه‌سل رهبرلیگی امنیت آژانسی، یئنی سالدیری حاضیرلیغیندا اولان و شهرین موختلیف یئرلرینده گیزلنن داعش عضوو 8 تروریستین ده اله کئچیریلدیگینی آچیقلاییب.

بو ترورچولارین، داکوک محلی ایله بشیر کندی چؤل آراسین‌داکی بوشلوق‌دان شهر مرکزینه سیزدیغی، داها سونرا سای‌لاری یوزه چاتان سالدیرقانلارین دؤرد قروپ حالیندا ماشینلارا میندیریلیب شهره سؤوق ائدیلدیگی بیلدیریلدی.

توتولان تروریست‌لر حاقیندا سوروشدورما داوام ائدیر.