Rusiyäneñ yärdäm konvoyı Xankände şähärenä kilep citte
Baqı-Yerivan mönäsäbätläre ike il arasında 44 kön däwam itkän suğıştan birle iñ naçar xäldä.
Ärmän köçläreneñ şimbä könne Azärbaycanğa bäyle Qarabaxta ütkärgän saylawın global aktyorlar gäyeplägän bulsa ike il arasındağı soñğı utnı tuqtatu kileşüendä aradaşçı bulğan Rusiyä İlbaşı Vladimir Putin Azärbaycannıñ suverenlığın qabat rasladı.
Vladimir Putin, Rusiyä İlbaşı:
“Ärmänstan citäkçelege Qarabaxta Azärbaycan suverenlığın tanıdı häm bu wazğıyätne Praga beldergesendä räsmi bularaq terkäp quydı. Qarabaxnıñ statusu turıdan-turı Ärmänstan tarafınnan bilgelände".
Awrupa Berlege, Törkiyä häm AQŞ ta legetim bulmağan bu saylawnıñ näticälären tanımadı.
Matthew Miller, AQŞ Däwlät departamentı süzçese:
“Bez Qarabax töbägendä açıq liniyalarnıñ buluınıñ häm ike taraf arasında dialognıñ alıp barıluınıñ zarurlığına daimi räweştä basım yasadıq. Qarabax töbägeneñ şuşı barışta ışanıçlı wäkilläreneñ buluı ähämiyätle torış, fäqät, monnan alda da äytkänebez kebek Qarabax töbägen bäysez häm suveren däwlät bularaq tanımıybız. Şuña kürä soñğı berniçä kön êçendä iğ’lan itelgän güya ilbaşı saylawı näticälären tanımıybız".
Törkiyä İlbaşı Ärdoğan här ike ilneñ liderları belän telefon söyläşülären ütkärep regional' tınıçlıqnıñ möhimlegenä basım yasadı.
Ärdoğanğa kürä, töbäktä ozaq waqıtlı totrıqlılıq urnaştırıluınıñ berdänber yulı diplomatik tırışlıq sarıf itüdän uza.
İke il arasındağı kiyerenkelek Laçin koridorınıñ qullanıluı arqasında da arttı. Bu koridor yawlap alınğan töbäk belän Azärbaycan arasında möhim bäyläneş yulı wazıyfasın üti. Ärmänstan töbäkkä xärbi qorallarnıñ häm cihazlarnıñ qanunsız räweştä alıp barıluın totqarlaw öçen çik buyı kontrol’ noqtasın tözegän Azärbaycannı yulı bloklawda gäyepläde.
Xikmät Xacıyev, Azärbaycan İlbaşı kiñäşçese:
“2020nçe yıldağı öçyaqlı kileşügä qul quyılğannan birle ärmän yağı berniçä tapqır häm sistemalı räweştä Azärbaycan cirlärennän uzğan Laçin koridorın xärbi personal, qoral häm minalarnı qanunsız räweştä taşu maqsatınnan çığıp naçar niyät belän qullandı. Ärmänstan bu koridornı Xalıqara Qızılxac konvoyı sağı astında xätta kontrabanda maqsatı belän dä qullanırğa tırıştı".
Yäkşämbe könne taraflarnıñ kileşelgän häm şuşı yünäleştäge taläpläre nigezendä humanitar yärdämneñ citkerelüe maqsatınnan çığıp Ağdam-Xankände yulı saylandı.
Bu täräqqıyät Azärbaycan Qızılayı belän koordinaśiyäle räweştä oyıştırılğan Rusiyä Qızıl Xac yärdäm konvoyınıñ Qarabaxta yäşäwçe ärmännär tarafınnan waqıtlıça totqarlawınnan soñ buldı.
Belgeçlär ärmännär yasağan şuşı adımnıñ Azärbaycannıñ yullarnı yabıp humanitar krizis tudıruı turındağı ärmän raslawlarınıñ nigezsez buluın kürsätüen belderä.
Bära Qaraman, TRT World
