Törkiyä BMOda ike däwlätle çişeleşkä basım yasadı
Törkiyä barı ike däwlätle çişeleşneñ Fälästin - İzrail mäsäläsen çişä aluın söyli
Törkiyäneñ BMOdağı daimi wäkile ilçe Äxmät Yıldız Fälästinneñ Berläşkän Millätlär oyışmasına tulı äğ’za bulırğa xaqı barlığın äytte. Ul AQŞnıñ N’yu-York şähärendä BMO ğomum şurasında oyıştırılğan aşığıç maxsus utırışta çığış yasadı.
Yıldız äytüençä, Fälästinneñ BMOğa tulı äğ’zalığın İminlek şurasında qabat qarawnı sorawçı qararnıñ 143 uñay tawış aluı xalıqara cämäğat’çelekneñ berdäm poziśiyäsen kürsätä. Ul Törkiyäneñ bu tarixi qararnı citkerüçelärdän berse buluı öçen ğorurlanuın da citkerde.
“Qararnıñ qabul itelüe barı Fälästinneñ däwlät tözü yulında ähämiyätle yul taşı ğına tügel. Ul, şul uq waqıtta, BMO İminlek şurası häm xalıqara cämäğat’çelekneñ tawışı arasındağı artuçı ayırmanı kürsätä”,-dide ilçe.
Äxmät Yıldız Räfaxta kiyerenkelekneñ bik borçu tudıruçı buluına iğ’tibarnı cälep itä. Ul Ğazzädä tabılğan kümäk qaberleklärneñ dä xälneñ citdiligen kürsätüen assızıqlıy. İlçe töbäktä İzrailneñ qan qoyuın kiçekmästän tuqtatırğa kiräklegen häm qabatlanmasın öçen daimi ike däwlätle çişeleşneñ şart buluın söyläde.
