Ärdoğan Antaliyadä söyläşülär ütkärä

Törkiyä ilbaşı Räcäp Tayyip Ärdoğan Antaliya diplomatiya forumında qatnaşuçı däwlät häm xökümät başlıqları belän söyläşülär ütkärä.

Ärdoğan Törekmänstan parlamentınıñ Xalıq Mäsläxäte Räise Ğorbanğulı Bärdemöxämmädov belän küreşte.

İlbaşı idaräseneñ êlemtä bülege räislegennän yasalğan açıqlawğa kürä söyläşüdä Törkiyä belän Törekmänstan mönäsäbätläre, regional’ häm global’ mäs’älälär belän İzrailneñ tınıç xalıqqa höcümnäre quzğatıldı.

Törkiyä ilbaşı söyläşüdä İzrail höcümnäreneñ qabul itelmäslek buluın, töbäkkä cibärelgän gumanitar yärdämnärne arttıru öçen Törkiyä häm Törekmänstannıñ xezmättäşlek başqara alaçağın açıqladı.

Söyläşüdä Törkiyä belän Törekmänstan arasında “Tabiğıy gaz ölkäsendä xezmättäşlekneñ üsterelüenä qarağan ike yaqlı xezmättäşlek kileşüe”, “Neft’ häm tabiğıy gaz ölkälärendä xezmättäşlek belän bäyle bäyannamä” häm “Törekmänstan hawa yulları belän Törek aviaśiya oyışması universitetı arasında kileşü” imzalandı.

Ärdoğan forum qısalarında Bolgariya däwlät başlığı Rumen Radev belän dä söyläşü ütkärde.

Êlemtä räislegennän yasalğan belderügä kürä Ärdoğan söyläşüdä Törkiyä häm Bolgariya arasında ayıruça saqlanu sänägäte häm ênergetika ölkälärendä xezmättäşlekneñ arttırıluı häm qalğan ölkälärdä dä mönäsäbätlärne üsterüneñ möhim buluın açıqladı.

Törkiyä ilbaşı söylaşüdä Törkiyäneñ Ukraina-Rusiyä häm İzrail-Fälästin mäs’älälärendä bäreleşlärneñ töbäkkä cäyelüen buldırmawğa östenlek birüen, problemalarnıñ dialog häm tınıçlıq yärdämendä çişelüe öçen tırışlıq quyuın äytte.