Greśiyä Törkiyä belän yaxşı mönäsäbätlär teli

Greśiyä xökümäte räise Kir’yakos Miśotakis Törkiyä belän bulğan uñay atmosferanı köçäytergä tırışaçaqların äytte. Ul Şveyśariyäneñ Davos şähärendä Bötendön’ya iq’tisadi forumı qısalarında yasağan çığışında uzğan yıl Törkiyädä bulğan cir teträwlärdän soñ ike aradağı mönäsäbätlärdä yaxşıru küzätelüen belderde. “Optimist bulırğa häm illärebez yasağan uñay adımnarnı köçäytergä telim”,-dide Miśotakis.

Anıñ äytüençä, ike däwlät arasında berdänber ähämiyätle problema - diñgez yoğıntı mäydannarınıñ çiklären sızu mäs’äläse çişelmäde. Greśiyä xökümäte räise, moña qaramastan, bergä yäşärgä häm uñay kön tärtibenä iğ’tibarnı kübräk cälep itärgä kiräklegen alğa sörde.