Törek astronavtınıñ oçışı kiçekterelde

Törkiyäneñ täwge ğaläm yulçısı Alpär Gäzäravcı da kerüçe “Ax-3” missiyäse 19nçı ğıynvarğa kiçekterelde. Bu xaqta sänäğat’ häm texnologiyä ministrı Mäxmät Fatix Kacır xäbär itte. Ul sośial’ media platformasında bolay dip yazdı: “Täwge astronavtıbız Alpär Gäzäravcı da urın aluçı oçırtu kiçekterelde. Xäzer planlaştırılğan oçırtu waqıtı 2024nçe yılnıñ 19nçı ğıynvarında Törkiyä waqıtı belän tönge 12 tulıp 49 minutta. Aña qadär oçırtu aldı texnik kontrol’lärneñ tögällänüe kötelä. Astronavtıbız Gäzäravcınıñ bu tarixi missiyäne uñışlı başqarıp çığuın dulqınlanıp kötäbez”.

“SpaceX” sośial’ media platforması “X”tan yasalğan belderüendä Xalıqara ğaläm stanśiyäsenä bügen bulırğa tiyeşle “Ax -3” missiyäseneñ AQŞ waqıtı belän 18nçe ğıynvarğa kiçekterelüen xäbär itte.