Blinken Törkiyägä kilä

Amerika Quşma Ştatları däwlät särqatibe Êntoni Blinken 5 nçe noyabr’dä Törkiyägä säfär yasıy.

Diplomatik çığanaqlardan alınğan mäğ’lümatqa qarağanda, Blinken Törkiyädän alda İzrail häm Yordaniyädä bulaçaq.

7 nçe oktyabr’dä İzrail belän “Xamas” arasında bäreleşlär başlanğannan soñ bu Blinkennıñ Tel’ - Avivqa öçençe säfäre.

AQŞ däwlät departamentı süzçese Mêtt’yu Miller Blinkennıñ comğa könne İzrail häm Yordaniyädä bulaçağın äytte.

”Blinken İzrailneñ xalıqara gumanitar zakonnar nigezendä üzen yaqlaw xoquqına yaqlawıbıznı yañartaçaq häm tınıç xalıq qorbannarın kimetü öçen barlıq çaralar kürü kiräklege, şulay uq gumanitar yärdäm kürsätü êşçänleklärebez turında söyläşäçäk”,- dide Mêtt’yu Miller.

İskärtep uzabız: “Xamas”nıñ qorallı törkeme “İz-ad-Din äl-Qassam” brigadaları 7nçe oktyabr’ irtäsendä İzrailneñ fälästinlelär häm “Äl-Aq’sa” mäçetennän başlap izge qıymmätlärenä qarata daimi xoquq bozularına qarşılıq kürsätü öçen külämle höcüm başladı.

 İzrail armiyäse dä Ğazzäne hawadan bombalarğa kereşte.

İzrail wäqalätleläre Ğazzädän yasalğan höcümnärdä 1400 keşeneñ ülüen, alarnıñ 315eneñ xärbi buluın belderde. 5 meñ 132 izraille isä yaralanğan.

İzrail armiyäse süzçese Daniêl’ Xagari “Xamas” qulında 240 izraille äsir buluın citkerde.

Ğazzädäge Fälästin sälamätlek saqlaw ministrlığı İzrail höcümnärendä 3 meñ 648 bala, 2 meñ 290 xatın-qıznı kertep , barlığı  8 meñ 796 fälästinleneñ üterelüen, 22 meñ 219 keşeneñ cäräxätlänüen belderde.