Türkiyädän (Төркиядән) Liviyägä yärdäm

Su basu afätennän zur zarar kürgän Liviyägä Türkiyä (Төркия) qulın suzdı.

Milli saqlanu ministrlığı älege ilgä êzläw-qotqaru törkemnäre belän töp yärdäm çaraları taşuçı berençe oçqıçnıñ başqala Änkaradan kütärelüen belderde.

Afät häm aşığıç xällär idaräse citäkçese Okay Memiş barlığı 3 yök oçqıçı kitäçägen, oçışlarnıñ 4 säğat’ ara belän yasalaçağın äytte. “Türkiyäneñ, törek däwläteneñ, törek milläteneñ yärdäm qulın dus häm qardäş Liviyä xalqına suzaçaqbız,”-dide ul.

İlbaşı Räcäp Tayyip Ärdoğan Liviyädäge tabiğıy afät turında sośial’ mediada yasağan belderüendä bolay dide: “Türkiyä (Төркия) Liviyä xalqınıñ yanında. AFAD oyışmabıznıñ koordinaśiyäsendä Bingaziğa 3 oçış säfäre äzerlände”.

Älege oçqıçlar belän täwge êtapta êzläw-qotqaru häm başqa êşçänleklärgä yärdäm maqsatınnan 168 xezmätkär, 2 qotqaru texnikası, 2 köymä, berençe ixtiyac kiräk-yaraqların qanäğat’länderü öçen 170 çatır, 600 odeyal, 400 azıq-tölek häm gigiyena cıyılması, 20 generator, 1 meñ yañğırdan saqlawçı kiyem, 500 rezin itek häm 500 qul fonare yullana.