Ärdoğan AQŞ möselmannarın qabul itte

Türkiyä ilbaşı Räcäp Tayyip Ärdoğan Qor’än-i Kärimgä qarşı höcümnärgä “süz irege” sıltawı astında röxsät birüläreneñ qabul itelmäyäçägen här forsatta telgä aluların citkerde. Bu xaqta ul AQŞ möselman oyışmaları şurası ğomum särqatibe Usame Cemal häm anıñ belän bergä kilgän delegaśiyäne qabul itüdä söyläde.

Ärdoğan anda möselmannar bularaq terrorçılıqtan näfrät cinayät’lärenä qadär bik küp problema belän ber ük waqıtta köräşülären söyläde.

“Könbatışta kön sayın tağın da kiñräk taraluçı islamofobiya borçularıbıznı arttıra. Bu çirle ruxi xalät qarşında möselmannarnıñ tawışın işetterü öçen kürsätkän tırışlıqlarığıznı yaqınnan küzätäm häm yuğarı bäyälim. Ömmätebezneñ islamofobiyä, tüzemsezlek häm diskriminaśiyägä qarşı toruı häm berdäm buluı bu yanaw belän köräştä zur ähämiyätkä iyä,”-dide Ärdoğan.  

Ul Qor’ängä höcümnärneñ “süz irege” tügel, näfrät ğamäle häm qırğıylıq buluın tağın ber qat assızıqladı. “Şveśiyä, Niderland häm ayıruça Daniyädä qabatlanuçı höcümnär demokratiyä häm keşe xoquqlarınıñ bu geografiyädä urnaşmawın kürsätä,”-dide ilbaşı.  

Türkiyä liderı AQŞ möselman oyışmaları şurasına möräcäğat’ itep bolay dide: “Qor’ängä höcümnärneñ “süz irege” sıltawı belän yaqlanmayaçağın, bolarnıñ cämäğat’çelek tınıçlığın häm totrıqlılıqnı bozunı maqsat itep quyuın Amerika kongressı häm başqa säyäsi tiräleklärdä êffektiv räweştä añlatuığıznı kötäm. Türkiyägä qarşı lobbilärneñ pıçratu kampaniyälären täêsirsez xälgä kiterüdä sezneñ yärdämegezneñ faydalı bulaçağın uylıym. Terrorçı oyışmalar PKK, PYD, YPG häm FETÖ turındağı çınbarlıqlarnıñ Amerika cämäğat’çelegenä citkerüdä sezneñ dä öleş kertüegezne kötäm”.