"Ärdoğan - Putinnı kileşügä kire qaytara alaçaq berdänber lider"

Ukrainanıñ tışqı êşlär ministrı Dmitro Kuleba Törkiyä ilbaşı Räcäp Tayyip Ärdoğannıñ Rusiyä däwlät başlığı Vladimir Putinnı Qara diñgez aşlıq koridorı kileşüenä kire qaytara alaçaq berdänber lider buluın belderde.

Ministr Kuleba Qara diñgez aşlıq kileşüe belän bäyle bularaq Ukraina däwlät agentlığı “Ukrinform”ğa açıqlaw yasadı.

Rusiyäneñ kileşüne tuqtatuın xäterlätkän Dmitro Kuleba Ukrainanıñ Türkiyä belän Putinnıñ bu kileşügä kire qaytuı mäs’äläsendä üzrara bäyläneştä buluın açıqladı.

 “Ukraina Putinnıñ Qara diñgez aşlıq koridorı kileşüenä qaytuı öçen Ärdoğan belän koordinaŝiya êçendä. Ärdoğan da bu mäs’älädä Ukraina liderı Vladimir Zelenskiy belän koordinaŝiya xälendä. Bu – ike yaqlı fayda. Ärdoğan Putinnıñ kileşügä kire qaytuın täêmin itä alaçağı berdänber lider,” – dide Ukraina tışqı êşlär ministrı.

Uzğan yılnıñ 24 fevralendä başlanğan Rusiyä-Ukraina suğışınıñ dön’yaküläm azıq-tölek bäyälärenä täêsiren azaytu öçen Berläşkän Millätlär Oyışması, Rusiyä, Türkiyä häm Ukraina 2022 yılnıñ 22 iyul’ könne İstanbulda oyıştırılğan tantanada Qara diñgez aşlıq koridorı kileşüen imzalağan ide.

Kreml süzçese Dmitriy Peskov waqıtı tulğan kileşü belän bäyle bularaq 17 iyul’dä açıqlaw yasadp bolay dide: “Aşlıq koridorı kileşüe azağına yaqınlaştı, tuqtatıldı. Rusiyä qayber şartlar ütälgän oçraqta aşlıq kileşüenä kire qaytaçaq. Kileşüneñ Rusiyägä qağılışlı öleşe cirenä citkerelmäde.”