Ärdoğannıñ Berlin cirteträw konferenśiyasına video yullaması

Ärdoğan Türkiyä palatalar häm birjalar berlege belän Germaniya säwdä häm sänäğät palatası tarafınnan Germaniyada oyıştırılğan "Berlin cirteträw konferenśiyäse”nä video yullama cibärde.

Türkiyäneñ 6nçı fevral’da Kahramanmaraş êpiśentrlı ike zur cirteträw belän tetränüen, "ğasırnıñ fäläkäte” dip bäyälängän cirteträwlärdä 50 meñnän kübräk watandaşnıñ häläq buluın xäterlätüçe Ärdoğan zilzilä bulğan 11 vilayättä 872 meñ möstäqıyl öleşe bulğan 311 meñ binanıñ qullanılmaslıq xälgä kilüen äytte.

Êş urınnarınıñ, igen basularnıñ, säwdäxanälärneñ häm êşxanälärneñ zarar kürüen, 14 million keşeneñ zilziläneñ tiskäre yoğıntısın turıdan-turı yäşäwen belderüçe Ärdoğan berençe könnän birle däwlätneñ böten mömkinleklären êşkä cigüen, millätneñ dä cirteträw töbägendäge qardäşläre öçen mobilizaśiyälänelüen xäterlätte.

Dön’yanıñ dürt ber yağınnan cirteträw töbägenä aşıqqan dus häm qardäş illärneñ yärdämnären hiç onıtmayaçaqların iskärtep uzuçı Ärdoğan şuşı awır köndä Türkiyä belän bergä bulğan härkemne räxmät xisläre belän iskä töşeräçäklären belderde.

Töbäktä tormışnıñ cayğa salınuı öçen tığız tırışlıq sarıf itülären bilgeläp uzuçı Ärdoğan bolay dip äytte:

"Bez cirteträw riskı bulmağan mäydannarda daimi toraqlarnıñ tözeleşen tiz başladıq. Üktäbr’, noyabr’ aylarınnan soñ tözeleşe tämamlanğan toraqlarnı êtaplap tapşıraçaqbız. Berençe yılda 319 meñ toraqnıñ tözeleşen tögälläp, xoquqlı xucalarına tapşıraçaqbız. Barlığı 650 meñ toraq salunı maqsat itäbez. Bez şähärlärebezne êlekkegä qarağanda tağın da ışanıçlıraq häm nığraq itüdä täwäkkäl. Cirteträwneñ ilebez iq’tisadına çığımı tuplam 104 milliard dollar bularaq isäplänelä. Bu awır yökneñ astınnan sez duslarıbıznıñ yärdäme belän dä inşallah bergä kütärelerbez”.