Ärdoğan: “Berlektäşlärebezdän nıq häm anıq totış kötäbez”

Ärdoğan Litva başqalası Vilniustağı (Vil’nyustağı) NATO däwlät häm xökümät başlıqları sammitınnan soñ matbuğat oçraşuın oyıştırdı.

İlbaşı Ärdoğan çığışında: "Qayber berlektäşlärebezneñ “PYD/YPG” belän urnaştırğan bozıq mönäsäbätläre ittifaqnıñ berdämlegenä häm bötenlegenä zarar birä. Monıñ bernindi qabul itelerlek häm mantıyqlı añlatması yuq”, - dip äytte.

İlbaşı Ärdoğan: " Terrorçılıq belän özleksez häm ayawsız köräş” bezneñ qızıl sızığıbız. Monnan arı böten berlektäşlärebezdän bu mäs’älädä nıq häm anıq totış kötäbez", - dip äytte.

Aşlıq koridorı belän bäyle bularaq Däwlät başlığı Ärdoğan: "(Ukraina İlbaşı Volodimir) Zelenskiy iniśiativanıñ däwamın yaqlıy, (Rusiyä İlbaşı Vladimir) Putinnıñ da qayber täq’dimnäre buldı. Bez, bu täq’dimnärne dä iğ’tibarğa alıp, çişeleşkä yünältelgän itep êşlibez”, - dide.

İlbaşı Ärdoğan: "(Rusiyä-Ukraina) Taraflar bezneñ aradaşçı buluıbıznı täq’dim yäki qabul itsälär, bez mondıy aradaşçılıqnı şatlanıp qabul itärbez”, - dip belderde.

Ärdoğan: "Här ike kürşebez belän bulğan yaqın dialogıbıznı iniśiativanıñ ozaytıluı häm krizislarnıñ xäl itelüe öçen qullanunı däwam itteräçäkbez. Bez härwaqıt äytkänçä, suğışta ciñüçe, tınıçlıqta da ciñelüçe yuq. Töbägebezdä tınıçlıq ömetlären yañadan barlıqqa kiterergä telibez”, - dip bilgeläp uzdı.

İlbaşı Ärdoğan, Türkiyäneñ NATOnıñ açıq işek säyäsäten härwaqıt xuplawçı il buluına basım yasap: "Xäzergä qadär bernindi ilneñ ittifaqqa kerüen nigezsez säbäplär belän totqarlamadıq”, - dip iskärtep uzdı.

Ärdoğan Şveśiyanıñ NATOğa quşıluı protokolların raslayaçaq organnıñ milli ixtıyarnıñ wäkile Türkiyä Böyık Millät Mäclese buluın belderde.

İlbaşı Ärdoğan Şveśiyada Qor’änneñ yandırıluı belän bäyle bularaq isä: "Keşelärneñ izge äyberlärenä höcüm itü fiker xörriyäte tügel, varvarlıq, artta qaluçanlıq, üzenä kürä terror ğamäle," – dip äytte.

Qor’änne yandıru ğamälen gäyıpläw ölgeseneñ Berläşkän Millätlär Oyışmasınıñ Keşe xoquqları şurasında tawışqa quyıluı mäs’äläsendä dä çığış yasawçı Türkiyä Prezidentı: "Ölgegä qarşı tawış birgän illär irek häm keşe xoquqları añlayışın küzdän kiçerergä tiyış,” – dip belderde.