Tışqı êşlär ministrı Fidan Azärbaycanda

Төркия Тышкы эшләр министры Xaкaн Фидaн Кушылмaучылaр xәрәкәтe координация бюрoсының министрлaр җыелышындa кaтнaшу өчeн Бaкыдa идe

Ministr Fidan Äliyıv tarafınnan qabul itelde

Türkiyä Tışqı êşlär ministrı Xaqan Fidan Quşılmawçılar (quşılmauçılar) xäräkäte koordinaśiya byurosınıñ ministrlar cıyılışında qatnaşu öçen kitkän Azärbaycan başqalası Baqıda İlbaşı İlham Äliyıv tarafınnan qabul itelde.

Azärbaycan İlbaşı idaräsennän (prezident apparatınnan) yasalğan belderügä kürä, Äliyıv uzğan ayda tışqı êşlär ministrı bulıp bilgelänüe uñayınnan Fidannı qotladı häm üzenä uñışlar teläde.

Äliyıv İlbaşı Räcäp Tayyip Ärdoğannıñ may ayındağı saylawdan soñ Azärbaycanğa yasağan räsmi säfären “ike il arasındağı qardäşlek häm berlektäşlek mönäsäbätläreneñ ürnäge” bularaq bäyäläwen iskärtep uzdı.

Xaqan Fidan isä häm monnan aldağı wazıyfalarında häm dä xäzer Azärbaycan belän Türkiyä arasındağı qardäşlek häm duslıq mönäsäbätläreneñ üsterelüen prioritet bularaq bilgeläwen äytte.

Fidan Türkiyäneñ Quşılmawçılar xäräkäte koordinaśiya byurosınıñ ministrlar cıyılışına çaqırıluı uñayınnan da räxmätlären citkerde.

Quşılmawçılar xäräkäteneñ uñışlı çirattağı räislege öçen Äliyıvne qotlawçı Fidan Azärbaycannıñ bik möhim barışnı äydäp baruına basım yasadı.

Äliyıv tä Fidanğa Azärbaycannıñ Quşılmawçılar xäräkäteneñ çirattağı räislege barışında başqarğan êşçänlegen añlattı.

İlbaşı Äliyıv ayıruça Azärbaycan belän Ärmänstan arasındağı mönäsäbätlärneñ cayğa salınuı häm Kön’yaq Qavqazda tınıçlıqnıñ häm iminlekneñ urnaştırıluı öçen alıp barılğan barış turında da Fidanğa mäğ’lümat birde.

“Awrupada İslamğa qarşı höcümnär kizügä äylände diyärlek”

Ministr Fidan Azärbaycan başqalası Baqıda Azärbaycan tışqı êşlär ministrı Cäyhun Bayramovnıñ çaqıruı belän qatnaşqan Quşılmawçılar xäräkäte koordinaśiya byurosı ministrlar cıyılışında çığış yasadı.

1967nçe yıldağı çik buylarına turı kiterep başqalası Könçığış Qodüs bulğan, İzrail belän yänäşä üz barlığın däwam ittergän suveren häm bäysez Fälästin däwläten härkemneñ yaqlawnıñ zarurlığın belderüçe Fidan: "Yaqın Könçığışta tınıçlıqnıñ berdänber çınlıqçı formulası şuşıdır”, - dip äytte.

Fidan Fälästinneñ möstäqil (möstäqıyl’) häm tigez äğ’za bularaq xalıqara cämğıyättäge torışın iñ qısqa waqıtta aluınıñ möhimlegenä dä işarät itte.

Şul uq waqıtta möselmannarğa, çığışı belän Afrikadan häm Aziyadan bulğan keşelärgä, yähüdlärgä häm möhacirlärgä qarata näfrätneñ moñarçı kürenmägän däräcägä citüenä iğ’tibarnı yünältüçe Fidan bigräk tä Awrupada İslamğa qarşı höcümnärneñ kizügä (êpidemiyağa) äylänüen diyärlek belderde.

Ministr Fidan, Qorban bäyrämeneñ berençe könendä Şveśiya başqalası Stoqhol’mda Qor’änneñ yandırıluın xäterlätep: "Monıñ süz irege sıltawı belän başqarıluına röxsät birelüe milliardlağan keşene açıqtan-açıqtan mısqıllaw, xurlaw. Läkin bu künelsez küreneşlär bezne tuqtatmasqa tiyış. Barıbız da Azärbaycannıñ milli şağire (şağıyre) Nizami Gäncävineñ çaqıruına qolaq salırğa tiyış: “Awır çaqlarda ömetsez bulma. Qara bolıtlar aq yanğırnı yawdıra”, - dip äytte.

Ministr Fidan Baqıda wazıyfadaşları belän oçraştı

Xaqan Fidan Baqı oçraşuları qısalarında Malayziya, Belarus häm Üzbäkstan, Ğiraq (Ğıyraq), Quveyt, Aljir tışqı êşlär ministrları belän ayırım-ayırım küreşep söyläşte.

Türkiyä (Төркия) tışqı êşlär ministrlığınıñ “Twitter” akkauntınnan urtaqlaşılğan yazmasında ministr Fidannıñ 6 wazıyfadaşı belän söyläşülärennän töşerelgän fotosürätlär urnaştırılğan.

Yazmada ministr Fidannıñ Malayziya tışqı êşlär ministrı Zambry Abdul Kadir, Belarus tışqı êşlär ministrı Sergey Aleynik, Üzbäkstan tışqı êşlär ministrı Bahtiyar Saidov, Ğiraq (Ğıyraq) tışqı êşlär ministrı Fuad Xösäyın, Quveyt tışqı êşlär ministrı Şäyıx Saläm Abdullah Al-Jabär Al-Sabah, Aljir tışqı êşlär ministrı Äxmäd Attaf belän ayırım-ayırım oçraşuı belderelde.