Çit ildä tawış birü bügen tögällänä
Türkiyä dä 2023nçe yılnıñ 28nçe may yäkşämbe könne ütkäreläçäk İlbaşı saylawınıñ ikençe turı öçen çit il wäkilçeleklärendä tawış birü bügen tögällänä
Türkiyä dä 2023nçe yılnıñ 28nçe may yäkşämbe könne ütkäreläçäk İlbaşı saylawınıñ ikençe turı öçen çit il wäkilçeleklärendä tawış birü bügen tögällänä.
Saylawnıñ ikençe turı öçen çit il saylaw reestrında terkälgän 3 million 423 meñ 759 saylawçıdan 1 million 763 meñ 973ese çit il wäkilçeleklärendä häm tamğaxanälärdä tawış birde.
Yuğarı saylaw şurasınıñ saylaw öçen bilgelägän kalendar-planğa kürä, çit il saylaw reestrına terkälgän saylawçılarnıñ tawış birä aluı öçen 73 ildäge 151 wäkilçelektä 167 urında ärcälär qorıldı.
Yuğarı saylaw şurasınıñ kalendar-planına kürä, 20nçe mayda başlanğan tawış birü bügen tögällänä.
Çit il saylaw reestrına terkälgän saylawçılar yäşägän urınnıñ cirle waqıtı belän säğät 22.00gä qadär tawış birä alaçaq.
Şul uq waqıtta tamğaxanälärdä isä 28nçe may säğät 17.00gä qadär tawış birergä mömkin.
Çit illärdä tawış birü tögällängännän soñ tawış byulletennäre Yuğarı saylaw şurası bilgelägän ısullar belän yuğarı iminlek astında diplomatik kur’yerlar belän Türkiyägä alıp kitereläçäk.
Çit ildä yäşäwçe saylawçılarnıñ tawışları Türkiyädä 28nçe may yäkşämbe könne säğät 17.00dä tawış birü tämamlanğannan soñ başqa ärcälär belän bergä açılaçaq.
