"1 million möhacir kire kitäçäk"

Türkiyä ilbaşı Räcäp Tayyip Ärdoğan süriyälelärneñ illärenä kire qaytuları öçen proyektlar alıp baruların belderep: “1 million möhacirne cibärü öçen planıbız bar,”-dide. Ul Türkiyä teleradiokompaniyäseneñ urtaq êfirında könüzäk mäs’älälär belän bäyle sorawlarğa cawap birde.

Ärdoğan illärendäge grajdannar suğışınnan qaçıp Türkiyägä sıyınğan süriyälelärneñ imin räweştä kire kitüläre öçen êşçänlek alıp baruların assızıqladı. Ul monıñ öçen Süriyäneñ tön’yağında brikettan öylär tözülären, älegä qadär 560 meñ möhacirneñ watannarına qaytuın xäterlätte. Tağın 1 millionına urın äzerlänä. “Älbättä, waqıtı belän ul tormışqa aşırılaçaq. Süriyälelärneñ qurqınıçsız moxittä illärenä qaytuın täêmin itü öçen tırışabız,”-dide ilbaşı.

Ärdoğan çik buylarınıñ soñğı texnologiyälär belän cihazlandırıluın belderde. “Türkiyä çikläre moñarçı kürelmägän qadär ışanıçlı,”-dide ul.

Ärdoğan, şulay uq, Süriyäneñ tön’yağında törek ğaskärläreneñ qalaçağın da äytep bolay dide: “Süriyäneñ tön’yağındağı törek xärbilären çığarsaq, iminlek bulmas häm köçlär tağın da artaçaq”. Ul separatist terrorçı oyışma PKKğa qarşı uñışlı köräş alıp barıluın iskärtep: “PKK häm däwamçılarına qarşı köräşebezne il êçendä dä, tışında da däwam itärgä qararıbız nıq,”-dide.