"Şveśiyäne alırğa bez äzer tügel"
Ärdoğan CNNğa interv'yusında Şveśiyäneñ NATOğa kerüe mäs'äläsenä tögäl cawabın birde
Türkiyä ilbaşı Räcäp Tayyip Ärdoğan Şveśiyä terrorçılıqqa irek quyğan sayın bu ilneñ NATOğa kerüenä uñay qaramayaçaqların söyläde. Ul “CNN International”nıñ alıp baruçısı Bekki Andersonnıñ sorawlarına cawap birde. Süz Şveśiyäneñ NATOğa kerüe mäs’äläsenä dä qağıldı. Anderson Türkiyäneñ älege ilneñ ittifaqqa äğ’zalığın yaqlarğa äzer bulıp-bulmawın soradı. Ärdoğan bolay dip cawap birde: “Şveśiyä öçen xäzerge waqıtta äzer tügel. Ul terrorçı oyışmalarnıñ il êçendäge däwamçılarına, Stokgol’m uramnarındağı ğamällärenä bu räweşle irek quyğan waqıtta bez Şveśiyäneñ NATOğa äğ’zalığına uñay qarıy almıybız. Başta bu êşne xäl itärgä tiyeş. Çönki NATO däwläteneñ terrorçılıqqa qarşı köräştä nıq buluı kiräk. Terrorçılarnıñ NATOnıñ teläsä-qaysı äğ’zasına bolay qarşı çığuına berqayçan da yul quymasqa tiyeş. Çönki NATOnıñ mondıy üzençälege bar”.
