Daniyada tağın Qor'än kitabı häm Türkiyä bayrağın mısqıllaw oçrağı

Daniyädä Qor’än kitabı häm Türkiyä bayrağına qarata tağın ber tapqır provokaśion höcüm buldı. Anı älege ildäge islamofob häm ul’tra millätçe “Watanpärwärlär turı êfirda” dip ataluçı marginal’ törkemneñ äğ’zası başqara. Ul Türkiyäneñ Kopengagendağı ilçelege qarşında qabat törek bayrağı häm Qor’än-i Kärimne mısqıllıy. Provokator islamğa qarşı süzlär yazılğan banner açıp häm şiğar’lär qıçqırıp ay-yoldızlı bayraqqa höcüm itä. Ul bu mizgellärne Twitter akkauntında turıdan-turı êfirda kürsätä.

Türkiyädä uzuçı ilbaşı häm 28nçe çaqırılış deputatlarnı saylaw uñayınnan Daniyädä yäşäwçe watandaşlarnıñ tawış birüe pänceşämbe könne başlandı. Monıñ öçen ilçelekkä kilgän törek saylawçılar bu provokaśiyägä reakśiyä belderde. Alarnıñ berse Türkiyä bayrağın cirdän kütärde häm provokatorğa kisätü yasadı, monıñ öçen poliśiyäneñ qarşılığı belän oçraştı.

Bernindi köç qullanu oçrağı bulmağan demonstraśiyädän soñ Türkiyä üzeneñ reakśiyäsen, kisätülären Daniyä dairälärenä belderde.

İslamofob häm ul’tra millätçe “Watanpärwärlär turı êfirda” dip ataluçı marginal’ törkem Daniyädä 24nçe, 31nçe martta häm 14nçe aprel’dä dä Türkiyäneñ Kopengagen ilçelege qarşında Qor’ängä häm törek bayrağına höcüm oyıştırğan ide.

Daniyäneñ çiktän tış uñçı partiyäse liderı Rasmus Paludan da 27nçe ğıynvarda Türkiyäneñ Kopengagen ilçelege qarşında häm älege şähärdäge ber mäçet tiräsendä Qor’än kitabın yandırdı.