Sudandağı töreklär êvakuaśiyälänä

Sudanda armiyä belän Operativ yärdäm köçläre arasında 15nçe aprel’dän birle baruçı bäreleşlär säbäple ildäge törek watandaşların qaytaru däwam itä.

Diplomatik çığanaqlardan alınğan mäğ’lümatlarğa qarağanda, başqala Xartumnıñ kön’yaq-könçığışındağı Vad Mädäni şähärennän kiçä töşkä qadär 3 avtobus belän yaqınça 140 keşelek törkem yuğla çıqtı. Xartumda isä Afrika uramındağı qunaqxanägä cıyılğan 500läp törek watandaşı kiç 10 avtobus belän quzğaldı.

Türkiyäneñ Xartumdağı ilçelege bilgelägän tağın ber cıyılu urını – başqalanın tön’yağındağı Kafuri mäxälläse. Anda yaqınça 400 watandaş bar. Alarnı da iminlek şartların iğ’tibarğa alıp mömkin bulğan iñ tiz waqıtta êvakuaśiyäläyäçäklär.

Töreklär başta qorı cir yulı belän Êfiopiyägä baraçaq, annarı başqala Addis -Abebadan hawa yulı belän İstanbulğa oçaçaq. Türkiyä êvakuaśiyä törkemendä Azärbaycan, Yaponiyä, Qıtay, Meksika, Yämän şikelle başqa şaqtıy däwlätneñ dä watandaşı bar.

İlbaşı Räcäp Tayyip Ärdoğan 20nçe aprel’dä Sudan bäysezlek şurası başlığı häm armiyä komandirı, general Abdulfättax äl-Burxan häm Sudan bäysezlek şurası başlığı urınbasarı, “Operativ yärdäm köçläre” komandirı Möxämmät Xamdan Dagari belän ayırım-ayırım telefonnan söyläşte.

Tışqı êşlär ministrı Mäwlet Çavuşoğlu da 22nçe aprel’dä Sudan tışqı êşlär ministrı Ali äs-Sadıkka şaltırattı.

Bik küp il üz watandaşların êvakuaśiyäläw öçen Türkiyädän yärdäm soradı.

Sudanda armiyä belän “Operativ yärdäm köçläre” qorallı törkeme bäreleşläreneñ ikençe atnası başlandı. Anda 413 keşeneñ ğomere özelde, 3 meñ 551 keşe yaralandı.