Ärdoğan jurnalistlar belän söyläşte

Türkiyä ilbaşı Räcäp Tayyip Ärdoğan qayber telekanallarnıñ urtaq êfirında jurnalistlarnıñ sorawlarına cawap birde. Ul ênergetika tarmağındağı söyeneçle xäbärlär turındağı soraw nisbätennän bolay dip söyläde: “20nçe aprel’dä Qara diñgez gazı qullanılışqa kerä. Qara diñgez gazınıñ fakelın Filiosta qabızabız, şunnan soñ Türkiyä cirle gaznı qullana başlayaçaq. Ozaq yıllar buyı adım-adım yaqınayğan ênergiyä bäysezlegebezneñ utı ul könne Qara diñgezdä başlap dulqın şikelle böten ilebezgä taralaçaq”.

İlbaşı Ärdoğan İzrail köçläreneñ Äl-Aksa mäçetenä höcümnärenä dä qağılıp uzdı. Ul Ramazan ayında êşlängän älege ğamällärneñ qabul itelmäyäçägen äytte.

“Monı tışqı êşlär ministrlığı belän dä citkerdek, läğ’nät uqıdıq. Min dä çığışlarımda şulay uq ğayeplim. Bernindi qurqınıçsızlıq çarası mondıy keşeleksez tıqşınularğa säbäpçe bula almıy. Äl-Aksa mäçeteneñ tarixi statusı häm mäğ’näsenä, fälästinlelärneñ ışanu häm yäşäw iregenä qarata tıqşınu häm yanawlar tuqtatılırğa tiyeş,”-dide Ärdoğan.

Ul İzrailgä kiyerenkelekne arttıruçı, basımnı kütärüçe adımnardan tayçınırğa kiräklegen assızıqladı. “Bezneñ, ayırım alğanda, sinagogalarğa mondıy höcümnärebez barmı? Yähüd ğıybadätxanälärenä höcüm itäbezme? Bez alarnıñ izge urını bularaq qabul itäbez. Här xäldä häm şartta fälästinle qardäşlärebez yanında bulunı, izge urınnarıbıznı yaqlawnı däwam itäçäkbez. İzrail monı belep torsın,”-dip söyläde Türkiyä ilbaşı.