Ärdoğan belän Putin söyläşte

Türkiyä ilbaşı Räcäp Tayyip Ärdoğan Rusiyä däwlät başlığı Vladimir Putin belän telefonnan söyläşte.

İlbaşı apparatı êlemtä idaräsennän belderülärençä, äñgämädä ike ilneñ mönäsäbätlären üsterüçe adımnar häm Ukrainadağı suğışqa bäyle täräqqıyät’lär qaraldı.

Ärdoğan Qara diñgez aşlıq iniśiativasın qabat ozaytuğa uñay qaraşı öçen Rusiyä däwlät başlığı Vladimir Putinğa räxmät äytte. Türkiyä liderı Rusiyä belän Ukraina arasındağı bäreleşlärneñ kiçekmästän söyläşülär yulı belän tögällänüenä ähämiyät birüelären citkerde.

İlbaşı Ärdoğan Rusiyäneñ Soçi şähärendä kileşengän iq’tisadi xezmättäşlek nigezendä yaña adımnar yasıy aluların belderde.

Rusiy däwlät başlığı sarayı Kremldän yasalğan belderüdä ike lidernıñ säwdä häm iq’tisadi êlemtälärneñ uñay dinamikası, gaz cibärü häm Türkiyädä Akkuyu atom-töş stanśiyäsen tözü şikelle ênergetika tarmağındağı berdäm strategik proyektlarnıñ prośessınnan qanäğat’ qaluları telgä alınuı äytelä.

Äñgämädä cir teträw hälakätendä cimerelgän asqorma häm toraqlarnı qabat torğızu öçen Rusiyädän tözeleş materialları kiterüne täêmin itü mömkinleklären qarawda kileştelär.

İke lider, şulay uq, Süriyä mäs’äläse xaqında da söyläşä häm cayğa salınu prośessınıñ ähämiyäten assızıqlıy.

Putin ilbaşı Ärdoğanğa häm törek xalqına Ramazan ayı uñayınnan yaxşı teläklären citkerä.