Toggnı alırğa teläwçelär küp bulıp çıqtı

Türkiyäneñ êlektrlı avtomobile häm ber ük waqıtta aqıllı cihazı Togg T10X öçen aldan zakaz birü başlanğannan soñ täwge 4 säğat’tä 7 meñ 734 möräcäğat’ kilgän.

Şirkätneñ Twitter akkuntında bu nisbättän bolay dip yazıldı: “Bu räxmät kenä tügel, kübräk…27nçe martqa qadär däwam itäçäk aldan zakaz birü prośessınıñ täwge 4 säğatendä 7734 qullanuçıbız Togg T10X öçen möräcäğat’ itte. Bezgä ışanuığız öçen räxmät belderäbez. Bu ğorurlıq barıbıznıqı”.

2023nçe yıl buyı xucalarına tapşıralaçaq 12 meñ danä avtomobil’gä iyä buluçılarnı şobağa salıp bilgeläyäçäklär. Ğarizalar 27nçe martqa qadär qabul itelä. Alarnı Trumore programması yäisä Toggnıñ veb säxifäse aşa birergä bula. Möräcäğat’ öçen başta 60 meñ lira tüläw şart.

Aldan zakaz birü çorı yabılğannan soñ lotoreya uynatu 28nçe martta notarius qatnaşında başqarılaçaq.