Türkiyä Milli saqlanu ministrlığınıñ Aşlıq koridorı belderüe

2022nçe yılnıñ 24nçe fevral’ könennän birle däwam itüçe Rusiyä-Ukraina suğışı arqasında yäşängän “azıq-tölek krizisı” riskınıñ beterelüe öçen Türkiyäneñ tırışuları belän buldırılğan “Aşlıq koridorı”nda ğamäldä bulu waqıtı normal’ şartlarda 18nçe martta betä.

Şveyśariyanıñ Jeneva şähärendä Aşlıq koridorı kileşüeneñ ozınaytıluı belän bäyle bularaq Berläşkän Millätlär Oyışması häm Rusiyä arasında söyläşülär ütkärelgän, taraflardan Rusiyä Aşlıq koridorı kileşüeneñ tağın 60 köngä ozınaytıluın qabul itülären açıqlağannar ide.

Türkiyä Milli saqlanu ministrlığınnan yäşängän alğarışlarğa qağılışlı belderü yasaldı.

Milli saqlanu ministrlığı tarafınnan yasalğan belderüdä:

“Türkiyä, Rusiyä, Ukraina häm Berläşkän Millätlär Oyışması tarafınnan xörmätle İlbaşıbız (Räcäp Tayyip Ärdoğan) häm Berläşkän Millätlär Oyışması Ğomum särkätibe xörmätle Antonio Guterreş qatnaşuında 2022nçe yılnıñ 22nçe iyül’ könne imzalanğan Qara diñgez aşlıq iniśiativası dokumentı qısalarında bügengä qadär Ukraina portlarınnan 24 million tonna aşlıqnıñ moxtac illärgä qurqınıçsız räweştä cibärelüe täêmin itelde,” – dip äytelde.

Belderüdä: “13nçe martta BMO koordinaśiyäsendä Jenevada BMO, Rusiyä häm Ukraina wäkillekläre arasındağı söyläşülärdä Rusiyä tarafınnan kileşüneñ 60 köngä ozınayıtıluın xuplayaçağı, Rusiyä azıq-tölek êşlänmäläre häm aşlamasınıñ xalıqara bazarlarğa êksportınıñ ciñeläytelüe mäs’äläsendä citärle alğa kiteş buldırılğan oçraqta kileşüneñ däwam itelüen yaqlayaçaqların açıqlağan ide. Taraflarnıñ iniśiativanıñ ozınaytııluı yünäleşendä yasalğan adımnarı täq’dir belän qarşılana,” – dip citkerelde.

Türkiyä Milli saqlanu ministrlığınıñ belderüendä kileşüneñ ozınaytıluı öçen törek räsmiläreneñ äñgämädäşläre belän söyläşülären däwam itterüe iskärtelep uzıldı.