Türkiyä häm Şveśiyä-Finlyandiyä daimi urtaq mexanizmı qabat aktivlaşa

NATO ğomum särqatibe Yens Stoltenberg Türkiyä häm Şveśiyä-Finlyandiyä daimi urtaq mexanizmınıñ qabat aktivlaşuın täêmin itärgä kiräklegen söyläde. Ul bu xaqta Şveśiyä xökümäte räise Ul’f Kristersson belän oçraşqannan soñ jurnalistlarğa äytte. Stoltenberg Şveśiyä belän Finlyandiyäneñ NATOğa kerüen täğayenläw xaqında söyläşülären belderde.

“Bu iñ ähämiyätle östenlegebez häm ul mäs’älädä alğa barabız. Türkiyäneñ qanunlı iminlek borçuları bar. Ber genä NATO äğ’zası da anıñ qadär küp terrorçı höcümnärenä duçar bulmadı. Şveśiyäneñ terrorçılıqqa qarşı yaña qanun çığarıp häm Änkara belän xezmättäşlekne köçäytep, PKKnı da kertep terrorçılıq belän köräştä tizlänüenä qanäğat’men,”-dide ul.

Stoltenberg, monnan tış, Şveśiyäneñ Türkiyägä qoral êksportı mäs’äläsendä çikläwlärne yuqqa çığaruın da assızıqladı.

9nçı martta Bel’giyäneñ başqalası Brüssel’dä NATO ştab-fatirında 3 ilneñ wäkilläre qatnaşında oçraşu uzaçaq. Stoltenberg anıñ turında da äytep uzdı. Ul ilbaşı Räcäp Tayyip Ärdoğannıñ 2022nçe yılnıñ 28nçe iyünendä NATO Madrid sammitında Türkiyä, Finlyandiyä häm Şveśiyä tözegän Daimi urtaq mexanizm cıyılışların qabat başlawnı qabul itüenä qanäğat’ buluın citkerde.

Stoltenberg Şveśiyäneñ dä, Finlayndiyäneñ dä Vil’nyusta iyül’dä oyıştırılaçaq sammitqa qadär ittifaqqa kerüe öçen tırışuın, tik tögäl data äytä almawın söyläde. Ä 9nçı martta uzaçaq öç’yaqlı utırış xaqında ul bolay dide: “Bu oçraşudan närsä çığaçağın aldan uq äytü mäs’äläsendä iğ’tibarlı bulırğa telim. Yuqsa söyläşü awır ütär. Oçraşunıñ tormışqa aşıp, prośessnıñ qabat aktiv xälgä kilüe ähämiyätle”.