Cir tetäwlärdä ülüçelär sanı 45 meñ 968gä citte

6nçı fevral’dä bulğan häm 11 töbäkkä zıyan salğan 7,7 häm 7,6 ball zurlığındağı Kaxramanmaraş cir teträwlärendä ülüçelär sanı 45 meñ 968 buldı. Bu xaqta Türkiyä êçke êşlär ministrı Söläyman Soylu Xataynıñ afät häm ğadättän tış xällär idaräsendä söyläde.

“Cir yözendäge iñ zur zilzilälär häm 400 çaqrım ozınlığındağı yarıq turında süz bara. Älbättä bu bezneñ öçen awır näticälär kiterde,”-dip söyläde ul. Ministr törek milläteneñ älege zur xäsrät waqıtında köçle berdämlek kürsätüen dä assızıqladı.

Soylu cir teträwdä ğomere özelüçelär turında bolay dide: “Bügengä qadär xaräbälärdä, xastaxanälärdä wafat buluçılar sanı 45 meñ 968. Alar arasında 4 meñ 267 süriyäle qardäşebez bar”.  

 Ministr moña qadär tulayım 13 meñ 72 afterşok buluın, monıñ ğadättän tış xäl tügellegen äytte. Ul citkergänçä, cir teträw töbäklärendä - 332, Xatayda 80 çatır şähäre oyıştırılğan. “1 million yarım keşe çatırlarda yäşi,”-dide Söläyman Soylu.

Ul Xatayda 21 meñ 895 konteyner yort qoru planlaştırıluın, 3 meñeneñ tözeleşe tögällänüen belderde.

Cir teträw bulğan urınnardan 2 million 141 meñ keşeneñ başqa töbäklärgä küçenüe açıqlanğan.