Viktor Orban: "Türkiyäne tıñlarğa kiräk"

Vengriyä xökümäte räise Viktor Orban NATOğa kerergä teläwçe Şveśiyäneñ Türkiyä öçen möhim bulğan şartlarnı iğ’tibarğa alırğa tiyeşlegen belderde. Ul Vengriyä däwlät radiosı Kossutta belderülär yasadı.

Orban Şveśiyä häm Finlyandiyäneñ NATOğa kerüen şäxsän yaqlawın, üzeneñ partiyäse Vengr watandaş berlegeneñ qayber deputatlarınıñ isä Vengriyä turında çınbarlıqqa turı kilmäwçe süzlär taratuı säbäple ike ilgä teräk bulırğa telämäwen citkerde.

“Ägär Şveśiyä häm Finlyandiyä NATO äğ’zalıqlarında Vengriyäneñ öleş kertüen teläsä, bu illär Vengriyä turında yalğan taratmasın,”-dide ul.   

Viktor Orban Şveśiyä belän bäyle Türkiyäneñ dä borçuları barlığın häm bolarğa iğ’tibar birergä kiräklegen iskärtte.

“Şveśiyädä Türkiyägä qarşı ğamällär qıluçı terrorçı oyışmalar barlığı töreklärne borçuğa sala. Türkiyä dä bezneñ berlektäşebez häm anı işetergä kiräk,”-dide ul.  

Orban ber yıldan birle däwam itüçe Rusiyä-Ukraina suğışına da qağılıp uzdı. Ul älege qanqoyışta berkemneñ dä ciñmäyäçägen, şuña kürä kiçekmästän utnı tuqtatırğa häm soñınnan tınıçlıq söyläşülären başlarğa kiräklegen söyläde.

“Rusiyä suğışta ciñä almayaçaq, çönki könbatış Ukraina öçen şulqadär küp qoral, ênergiyä häm aqça mobilizaśiyäli ki, mondıy köçkä qarşı açıq xärbi bäreleştä östen çığu mömkin tügel. Şulay uq, monıñ kirese dä döres, çönki atom-töş köçe bulğan Rusiyäneñ ciñelä alaçağın uylawçılar yalğışa,”-dide Vengriyä xökümäte räise Viktor Orban.