Töreklär Proteonı onıtmayaçaq

Türkiyäneñ Kocaäli töbäge Başiskälä rayonında tözelgän xaywan reabilitaśiyä üzägenä Meksika êzläw-qotqaru törkemeneñ Adıyamanda ülgän ête Proteonıñ iseme birelde.

Türkiyädä 6nçı fevral’dä bulğan zilzilälärdän soñ başlanğan êzläw-qotqaru êşçänleklärendä maxsus öyrätelgän êtlär aktiv rol’ başqardı.  Alar sizger borınnarı belän cimereklär astında keşelär buluın açıqlap, isän-imin çığarılularına öleş kerte.

Adıyamanğa kilgän Meksika törkemeneñ Proteo quşamatlı ête êşçänlek waqıtında hälaq buldı. Tik törek xalqı anı onıtmadı. Başiskälä mêriyäse tözetkän uram xaywannarı reabilitaśiyä üzägenä anıñ isemen birdelär. Mêr Mäxmät Yasin Özlü soiśal’ mediada yasağan belderüendä bolay dip yaza: “Meksikağa ozaq yıllar xezmät itkän Proteonıñ isemen üzägebezgä birdek. Proteo yıllar buyı bu üzäktä iskä alınaçaq”.  

İstanbulnıñ Sarıyer rayonındağı ber parkka isä kaharman êtneñ häykäle quyılaçaq. Älege park 2011nçe yılğı Van cir teträwennän soñ êzläw-qotqaru êşçänlekläre waqıtında hälaq bulğan Yaponiyä volontyerı, tabib Aśuşi Miyadzaki isemen yörtä. Anda Miyadzaki häm Proteonı iskä alu tantanası uzdı.  Çarada Sarıyer xakimiyäte başlığı Şükrü Genç, Meksikanıñ İstanbuldağı konsulı İsabel Arvide, Yaponiyäneñ İstanbuldağı konsulı Kasaxara Keniçi, Hindstannıñ İstanbuldağı konsulı Sudxi Çoudxari häm grajdanlı saqlanu törkeme qatnaştı.    

Şükrü Genç tantanadağı çığışında bolay dide: “Proteoğa tuğrılığı öçen bez burıçlı. Parkıbızda anıñ da häykälen urnaştırığa telibez”.