Fälästinle êşmäkär cir teträw töbägenä 15 tonna xörmä cibärde

Fälästinle xörmä citeşterüçe Türkiyädäge cir teträwlärdä zıyan kürgän keşelärgä 15 tonna xörmä cibärde.

İzrail yawı astındağı Fälästindä Türkiyägä teläktäşlek belderü häm yärdäm itü maqsatınnan oyıştırılğan çaralar däwam itä.

Cir teträw töbägenä êzläw-qotqaru törkemnäre cibärgän Fälästin matdi, aqçalata häm doğalar belän yärdäm kürsätergä tırışa.

Fälästinneñ “Emirates” şirkäte Türkiyädäge cir teträw töbäklärenä 15 meñ 600 kilogramm xörmä cibärde.

Ramallaxtağı şirkätneñ xucası Mäxdi Adas xörmäneñ bik faydalı buluına basım yasadı.

Adas: “Tarixta xörmä suğış häm afät kebek waqıtlar öçen möhim rizıq buldı. Döğe yäki it cibärsägez peşerü öçen şartlar yuq, töbäktä gaz häm êlektr yuq. Läkin xörmä häm söt keşegä kiräk bulğan barlıq matdälärgä iyä. Xörmä köne-töne êşläwçe êzläw-qotqaru törkemärenä dä köç birä”,- dide.

“Ata-babalarıbız bezne maşinalarğa, yortlarğa iyä bulırğa tügel, yaxşılıq êşläwdä yarışırğa öyrättelär” dip äytüçe fälästinle êşmäkär cir teträw arqasında ğomeren yuğaltqannarğa Allahtan yarlıqaw, cäräxätlänüçelärgä tiz sälamätlänülären teläde.