Çavuşoğlu häm Konakoviçneñ matbuğat oçraşuı

Tışqı êşlär ministrı Mäwlüt Çavuşoğlu 6nçı fevral’dä barlıqqa kilgän häm 10 vilayätkä täêsir itkän Kahramanmaraş êpiśentrlı cirteträwlärdän soñ Bosniya-Hersegovinadan zilzilä töbägenä barıp citkän êzläw-qotqaru törkemnäreneñ 26 keşene cimereklär astınnan qotqaruın äytte.

Ministr Çavuşoğlu Bosniya-Hersegovina tışqı êşlär ministrı Älmädin Konakoviç belän başqala Änkarada Tışqı êşlär ministrlığındağı söyläşüennän soñ urtaq matbuğat oçraşuın oyıştırdı.

Bosniya-Hersegovinanıñ teläktäşlek yullamaları häm cibärgän êzläw-qotqaru törkemnäre belän Türkiyäneñ yanında buluın belderüçe Çavuşoğlu: "Bosniya-Hersegovinadan 234 keşelek 13 êzläw-qotqaru törkeme cirteträwdän soñ şunda uq Türkiyägä kilde. Hatay, Adıyaman häm Kahramanmaraşta bik tırışıp êşlilär häm 26 keşene cimereklärdän qotqardılar. Cirteträwdän zıyan kürüçelär öçen çatır cibärdelär, aqçalata yärdäm wäğ’dä ittelär,” – dip äytte.

Xalıqara cämäğätçelektän dä zur yärdäm häm teläktäşlek kürülären iskärtep uzuçı Çavuşoğlu: "Xäzergä qadär yärdäm täq’dimen yasağan il sanı 100, xäzerge waqıtta cirlektäge êzläw-qotqaru törkeme cähätennän il sanı 76, personal 7 meñ 606, törkem cibärüe kötelgän tağın 2 il bar. Yäğ’ni 712 tiräsendä östämä personal da çit illärdän kiläçäk,” – dide.

Çavuşoğlu 12 ildän êzläw-qotqaru törkemnäreneñ, wazıyfaların tögälläp, illärenä qaytuın belderde.

Ministr Çavuşoğlu töbäktä üzixtıyarıy bularaq êşläwçe illärgä häm oyışmalarğa da räxmät citkerde.

Türkiyä belän berdämlek yullamasın yasawçı Älmädin Konakoviç ta: "Bosniya-Hersegovina bularaq êzläw-qotqaru törkemen cibärgänebez öçen bez ğorurlanabız,” – dip äytte.