Çavuşoğlu: "Ärmänstan xalqıbızğa duslıq qulın suzdı"
Türkiyä Tışqı êşlär ministrı Mäwlüt Çavuşoğlu: "Ärmänstan şuşı awır könebezdä xalqıbızğa duslıq qulın suzdı, teläktäşlegen häm xezmättäşlegen kürsätte,” – dip äytte
Mäwlüt Çavuşoğlu Ärmänstan tışqı êşlär ministrı Ararat Mirzoyan belän başqala Änkarada Tışqı êşlär ministrlığındağı söyläşüdän soñ oyıştırılğan urtaq matbuğat oçraşuında çığış yasadı.
Cirteträwlärdän soñ Ärmänstannıñ Türkiyägä 28 keşelek êzläw-qotqaru törkemen cibärüen citkerüçe Çavuşoğlu Ärmänstan törkemeneñ 8nçe fevral’dän birle Adıyamanda tırışıp êşläwen belderde.
Çavuşoğlu Ärmänstan êzläw-qotqaru törkemnäreneñ keçkenä ber qıznı häm xatın-qıznı qotqaruın äytep: "Alarğa da bik zur räxmät äytergä telim. Çınnan da bik tırışıp êşlädelär häm watandaşlarıbıznı qotqarğan çaqta ni qadär bäxetle buluların kürdek,” – dip iskärtep uzdı.
Ärmänstannıñ Türkiyägä 100 tonnalıq humanitar yärdäm cibärüen, wazıyfadaşı Mirzoyannıñ bügenge söyläşüe waqıtında da östämä yärdämnärne cibäräçäklären äytüenä iğ’tibarnı yünältüçe Çavuşoğlu Ärmänstannıñ Türkiyädän daimi bularaq östämä teläkläre barmı, yuqmı ikänlegen sorawın citkerde.
Çavuşoğlu: "Ärmänstan şuşı awır könebezdä xalqıbızğa duslıq qulın suzdı, teläktäşlek häm xezmättäşlek kürsätte,” - diyıp, Ärmänstannıñ 1999nçı yılda Gölcük cirteträwennän soñ da Türkiyägä humanitar yärdäm äyberlären cibärüen xäterlätte.
Ärmänstan tışqı êşlär ministrı Mirzoyan da: "Bu awır mizgellärdä Türkiyägä kilep tağın ber qat tınıçlıqnı urnaştıru ölkäsendäge telägebezne raslarğa telim,” – dip belderde.
6nçı fevral’dä Kahramanmaraşta barlıqqa kilgän häm 10 vilayät belän Süriyägä dä täêsir itkän 7,7 häm 7,6 zurlığındağı cirteträwlär meñnärçe keşeneñ ğomeren özgän bulsa, “ğasırnıñ fäläqäte” dip bäyälänä.
