Küp säğat'lär uzğaç ömetle xäbärlär

Türkiyäne tiränten teträndergän Kaxramanmaraş zilziläse bärgän töbäklärdä yözlärçä qotqaru törkeme häm meñnärçä volontyer cimereklär astınnan söyenderüçe xäbär birü öçen tırışa.

Bik küp säğat’lär, xätta täwleklär ütügä qaramastan, xaräbälärdän ömetländerüçe xäbärlär kilä. Qotqaru törkemnäre Xataynıñ İskändärun rayonında Mostafa Kämal mäxälläsendäge binalarnıñ berseneñ cimereklärendä yärdäm sorap çaqıruların işette. Êzläw êşçänlekläre tağın da tizlätelde, caylap xaräbälärne çistartıp, anıñ astınnan 33 yäş’lek xatın-qız häm anıñ 2 yäş’lek qızı çığarıldı. İmäd häm Vafä Sabxa süriyäle möhacir ğailä. Ana belän qıznı aşığıç yärdäm maşinasında xastaxanägä ilttelär. Törkemnärneñ xaräbälärdä êzläw êşçänlekläre däwam itä.

Xataynıñ üzägendäge Uğur Mumcu uramında işelgän yortnıñ astınnan 45 säğat’tän soñ ber balanı qotqardılar. Şul uq uramnan tağın ber yaxşı xäbär kilde. İkençe ber yort cimerekläre astınnan xatın-qıznı çığardılar, ul da 45 säğat’ buyı yärdäm kilüen kötkän.

Adıyamanda işelgän binanı qazuçı qotqaruçılar cir teträwdän 36 säğat’ uzğaç ber bäbäyne isän-saw qotqardı. Anı aşığıç yärdäm törkemnärenä tapşırdılar häm xastaxanägä ilttelär.  

Şanlıurfada da êzläw-qotqaru törkemnäre Yänişähir mäxälläsendäge 5 qatlı yortnıñ xaräbälärennän 47 säğat’tän soñ 6 yäş’lek Äxmät Ayaz Abak isemle balanı isän-imin kileş çığardı.