Cir teträwlär Anadolu yarımutrawın urınınnan küçerde

Kaxramanmaraştağı cir teträwlär Anadolu yarımutrawın 3 metr könbatışqa taba küçerde.

İtaliyäneñ cir teträw häm vulkanik aktivlıq mäs’äläsendä abruylı oyışması Milli geofizik häm vulkanologiyä institutınıñ citäkçese Karlo Doglioni matbuğatqa beldergänçä, zilzilä Könçığış Anadolu, Ğaräp häm Afrika plitäläre oçraşqan cirdä bula.

“Törkiyäneñ ber başınnan ikençe başına qadär suzılğan 2 zur yarılu sızığınıñ berse xäräkätlände. Bu ber ük waqıtta Yordaniyä, İzrail, Livan häm Süriyädän uzuçı Üle diñgez liniyäse belän bergä Yaqın Könçığışnıñ iñ aktiv sızıqlarınnan berse, çönki Ğaräp yarımutrawın Afrikadan ayırıp tora,”-di ğalim.

Doglioni älege yarılu sızığı buylap cirneñ xäräkät itüen äytte. “Maksimum xäräkät alanında 3 metr küçü buldı,”-dide ul. Belgeç älegä monıñ farazlar ğına buluın, tögälräk yasalma iyärçen kürsätkeçlären alğaç äytäçäklären citkerde.

Doglioni Türkiyädä kiçä bulğan cir teträwlärneñ bik zur zilzilä ikänen assızıqlıy.

Kaxramanmaraştağı cir teträwlär turında söyläwçe başqa belgeçlär dä anıñ İtaliyädä 2016nçı yılda bulğan häm 300dän artıq keşeneñ ğomeren özgän Amatriks zilziläsennän meñ qat köçle buluın belderde.