Türkiyä: “Tön'yaq Kipr Törek Cömhüriyäten tanırğa çaqırabız”

Tışqı êşlär ministrlığı Kipr utrawında urnaşqan Berläşkän Millätlär Oyışması Tınıçlıq köçe missiyasınıñ wazıyfa waqıtınıñ ozınaytıluına qağılışlı BMO İminlek şurası qararı turında yazmaça belderü yasadı.

Belderüdä BMO İminlek şurasınıñ Berläşkän Millätlär Oyışması Tınıçlıq köçeneñ wazıyfa möddäten 2023nçe yılnıñ 30nçı ğıynwar könne qabul itkän 2674 nomerlı qarar belän ber yılğa ozaytuı iskärtelep uzıldı.

Tön'yaq Kipr Törek Cömhüriyäte Tışqı êşlär ministrlığınıñ şuşı qarar belän bäyle bularaq yasağan açıqlawnıñ tulısınça xuplanuı citkerelgän belderüdä:

"BMO Ğomum särkätibeneñ xisaplarına kertelmäwenä qaramastan Şuranıñ, urındağı çınbarlıqtan ayırılğan räweştä Tön'yaq Kipr Törek Cömhüriyäteneñ ike däwlätle çişeleş yünäleşendä bilgelägän ixtıyarın sanğa suqmıyça, küp tapqır sınap qaralğan häm uñışsız bulğan çişeleş modellärenä basım yasawı kürenä. Bu wazğıyät aqıllı fiker häm yaxşı niyätkä turı kilmi, Şuranıñ Utrawda çın mäğ’näsendä çişeleşne täşviq itü urınına Kipr grek tarafınıñ yünälderüennän çığa almawın kürsätä,” – dip äytelde.

BMO İminlek şurasınıñ tağın ber qat Kipr törek xalqına qarşı qullanılğan keşeleksez häm xoquqsız êmbargolarnı da kürmämeşkä salınuına basım yasalğan belderüdä: "Qararda Tön'yaq Kipr Törek Cömhüriyäte İlbaşı Ärsin Tatarnıñ 2022nçe yılnıñ 1nçe häm 8nçe iyül’ könge xatları belän BMO Ğomum särkätibenä citkergän, Utrawnıñ şaqtıy ixtıyacın qanäğätländerä alaçaq, çınlıqlı, konstruktiv häm êçkersez xezmättäşlek täq’dimnäre iğ’tibarsız qaldırılıp, ike taraf arasında xezmättäşlek çaqıruınıñ yasaluı isä başqa ber qapma-qarşılıq,” – dip bilgeläp uzıldı.

Belderüdä: "Kiprda ğadel häm daimi çişeleş yulın açaçaq urtaq nigez – urındağı çınbarlıqnı nigez itep alırğa tiyış. Bu qısada İminlek şurasın häm xalıqara cämäğätçelekne Kipr utrawında ike ayırım xalıqnıñ häm ike ayırım däwlätneñ buluı çınbarlığına nigezlänep, Kipr törek xalqınıñ birelgän xoquqları bulğan suveren tigezlekne häm tigez xalıqara statusın raslarğa, Tön'yaq Kipr Törek Cömhüriyäten tanırğa çaqırabız,” – dip bäyäläw yasaldı.