Ärdoğan: “Adımnarıbızda bilgeläwçe mäs’älä Türkiyäneñ milli mänfäğätläre bulaçaq”

Ärdoğan Törekmänstan säfärennän qaytqan çaqta jurnalistlarnıñ sorawlarına cawap birde.

“Türkiyä-Rusiyä-Süriyä öç yaqlı bularaq adım yasarğa telibez,” – dip äytüçe İlbaşı Ärdoğan liderlar däräcäsendä oçraşunıñ bula alaçağına işarät itte häm Rusiyä İlbaşı Vladimir Putin belän mäs’äläne söyläşülären belderde.

Ärdoğan Süriyä mäs’äläsendä yasalaçaq adımnarda bilgeläwçe mäs’äläneñ Türkiyäneñ milli mänfäğätläre bulaçağın iskärtep uzdı.

Süriyädän Türkiyägä qarşı terror yanawlarına iğ’tibarnı yünältüçe Ärdoğan neft’ qoyılarınnan (skvajinalarınnan) terror oyışmalarınıñ finanslaw täêmin itüen äytte häm terror oyışmalarına yärdäm itüçe Amerika Quşma Ştatların tänqıytläp: "Bez bügengä çaqlı gel sabır ittek. Ämma monnan arı sabırlıq bette,” – dip äytte.

Ärdoğan, Germaniyanıñ tüntäreleşkä äzerlängän keşelärgä qarşı kürelgän çaralarnı da bäyäläp, “Fätullahçı” terror oyışması belän köräşkä tuqtalıp uzdı.

Türkiyä Däwlät başlığı: "Xäzerge waqıtta terror oyışmasınıñ Awrupadağı iñ möhim sıyınır urını Germaniya. Xäzerge waqıtta “PKK/YPG/PYD” qayda? Anda. “FETÖ” qayda? Anda. Bolarnı sorıybız, qaytarırğa uylamıyar da," – dip äytte.

İlbaşı Ärdoğan Törekmänstan gazınıñ Türkiyä aşa Awrupağa citkerelüe belän bäyle bularaq: "Türkiyä, Azärbaycan häm Törekmänstan ênergetika ministrları tiz genä oçraşıp bu mäs’äläne centekläp söyläşäçäklär”, - dip mäğ’lümat birde.

İlbaşı Awrupa Berlege tışqı mönäsäbätlär yuğarı wäkile Josep Borrell’neñ Rusiyägä qarşı sankśiyälär belän bäyle tänqıytläwen dä: "Bik yäm’sez ber açıqlaw”, - dip bäyäläp: "Rusiyä belän mönäsäbätlärebezne Borrell’ bilgelämi, bilgeli almıy. Anıñ bu mäs’älälärdä mondıy qarar qabul itäçäk sıyfatı da säläte dä yuq,” – dip belderde.