Ärdoğan: "Rusiyä yasağan belderügä xörmät belän qarıym"

Türkiyä ilbaşı Räcäp Tayyip Ärdoğan İndoneziyädä uzğan G20 liderlar sammitınnan soñ media üzägendä matbuğat cıyılışı uzdırdı.

İlbaşı Ärdoğan İstanbuldağı terrorçı höcümenä bäyle bularaq bolay dide: “Barlıq dus häm berlektäşlärebezneñ Türkiyäneñ xaqlı köräşenä êçkersez teläktäşlegen kötäbez”. Ul DEAŞ belän köräşne sıltaw itep terrorçı oyışmasına yärdäm itüçelärneñ dä här tügelgän qan tamçısı öçen cawaplı buluın äytte.  

Ärdoğan Türkiyäneñ terror yanawın çığanağında yuq itü strategiyäsen nıqlı räweştä tormışqa aşıruın däwam itäçägen belderde. “Närsä êşläsä dä êşläsennär, kemneñ artına yäşerensälär dä yäşerensennär - terrorçılar üzlären kötüce açı yazmıştan qotıla almayaçaq,”-dide ilbaşı. Ul ilneñ häm regionnıñ kiläçägendä terrorçılıqqa urın bulmawın assızıqladı.  

Ärdoğan Amerika Quşma Ştatlarınnan F-16 xärbi oçqıçların alu belän bäyle bularaq yasağan belderüendä: “Xörmätle (AQŞ ilbaşı Djo) Bayden uñay alğarışlarnıñ buluın söyläde,”-dide.

İlbaşı Tön’yaq Kipr törek cömhüriyäteneñ Törki däwlätlär oyışmasına küzätüçe äğ’za bularaq alınuı mäs’äläsendä dä belderü yasadı. “Bu qarar belän bäyle bularaq bernindi urınnan, hiçber ildän röxsät aluıbız kiräkmi. Ul êş tögällände,”-dide ul.  

Ärdoğan Pol’şağa raketa töşü oçrağına qarata bolay dip söyläde: “Rusiyä yasağan belderügä xörmät belän qarıym. Rusiyäneñ “Bu êçkä bezneñ qatnaşıbız yuq” diyüe bezneñ öçen ähämiyätle. Baydennıñ raketalarnıñ Rusiyädä yasalmawın belderüe dä Rusiyäneñ qatnaşı bulmawın kürsätä. Tikşerü, analizlaw kiräk”.  

Ärdoğan bolay dip östäde: “Bez Rusiyä belän Ukrainanı ber östäl artına cıyu öçen tırışqanda bu suğışnıñ öçençe urtağın tabu, çığaru kiräkmi”.  

Türkiyä ilbaşı aşlıq koridorı mäs’äläsendä söyläşülärneñ däwam itüen, kileşüneñ ozaytılaçağına ışanuın belderde. “Xörmätle Putin belän fikerläşep aşlama häm ammiak taşu mäs’äläsen qarayaçaqbız. Waqıtnı da 1 yılğa citkerergä tırışaçaqbız,”-dide Ärdoğan.