Bügen böten Türkiyä Atatörek öçen tın qaldı

Bügen Türkiyä cömhüriyätenä nigez salğan yulbaşçı Mostafa Kämal Atatörekneñ ülüenä 84 yıl tuldı. Ul 1938nçe yılnıñ 10nçı noyabrendä säğat’ 9 tulıp 5 minutta İstanbulnıñ Dolmabaxçä sarayında küzlären mäñgelekkä yoma.

Mostafa Kämal Atatörek 57 yıllıq ğomerendä  barı törek xalqınıñ Bäysezlek suğışın uñışlı citäklägän komandir ğına tügel, reformaları belän dahi däwlät başlığı bularaq ta tarixqa kerep qaldı.

Bügen Atatörekneñ ülemeneñ 84 yıllığı uñayınnan Anıtqaberdä räsmi tantana uzdı. Türkiyä ilbaşı Räcäp Tayyip Ärdoğan mavzoleyğa qızıl häm aq qanäferlärdän toruçı ay-yoldızlı täqıyä quydı. Atatörekneñ küzlären mäñgegä yomğan waqıt - säğat’ 9 tulıp 5 minutta ber minut tınlıq buldı häm şunnan soñ Türkiyä gimnı yañğıradı.  

İlbaşı Ärdoğan Anıtqaberneñ maxsus däftärenä bolay dip yazdı: “Ğaziz Atatörek, millätebezneñ küp ğasırlıq xıyalların çınğa aşırğançı tuqtamayaçaqbız, höcümnär qarşında yuğalıp qalmıyça köräşebezne nıqlı räweştä däwam itäçäkbez”.

Atatörekne il külämendä dä xörmät belän iskä aldılar. 9 säğat’ 5 minutta watandaşlar ber minut tın qalıp xörmäten belderde.