İlbaşı Ärdoğan Türkiyäneñ avtomobile “TOGG” qorılmasın açtı

Türkiyäneñ avtomobile “TOGG”nıñ citeşterü nığıtması bulğan Bursa Gämlik şähärçegeneñ açılışı İlbaşı Ärdoğan tarafınnan kiçä yasaldı.

Ärdoğan açılış tantanasındağı çığışında, “TOGG”nıñ abruylı törek markası bularaq dönyanıñ şaqtıy ilendä yullarnı bizäyäçägen belderep: "Massaküläm citeşterü liniyasınnan alıp, bez sezgä täq’dir itkän şuşı berençe maşina belän 60 yıllıq xıyalnıñ çınbarlıqqa äylänüen küzätäbez”, - dip äytte.

“Togg” belän bäyle bularaq watandaşlarnı qızıqsındırğan mäs’älälärneñ buluın, bolardan iñ möhim bulğanınıñ batareya häm zaryadlaw stanśiyäläre mäs’äläseneñ buluın belderüçe Ärdoğan: "“Togg” litiy-ion batareyalarınıñ ilebezdä êşläp çığarıluı ölkäsendä dönyanıñ aldınğı şirkätlärennän berse belän kileştek. “Togg” qorılmasınıñ yänäşäsendäge 609 meñ kvadrat metrlıq mäydanda tözeläçäk batareya êşxanäseneñ nigezen yaqında salabız”, - dide.

“Togg”nıñ qayçan yullarda bulaçağın da açıqlawçı Ärdoğan: "Bügen massaküläm citeşterü liniyasınnan çıqqan maşinalarnıñ test häm sertifikatlaw barışları xäzer ük başlıy. “Togg”nı, inşallah, 2023nçe yılnıñ berençe çiregeneñ axırında yullarıbızda küräçäkbez”, - dip belderde.