Äminä Ärdoğan belän Olena Zelenska oçraştı

Türkiyä ilbaşı Räcäp Tayyip Ärdoğannıñ xatını Äminä Ärdoğan Ukraina däwlät başlığı Volodimir Zelenskiynıñ xatını Olena Zelenska belän oçraştı. Alarnıñ küreşüe İstanbulda Vaxdettin sarayında uzdı.

Zelenska oçraşu barışında Ukrainadağı soñğı wäzğıyät’tän tış üz isemendäge waqıfnıñ êşçänlege turında söyläde. Ul ire Volodimir Zelenskiynıñ Ukrainağa birelgän yärdäm öçen cibärgän räxmät xatın Äminä Ärdoğanğa tapşırdı.

Olena Zelenska Türkiyäneñ ğailäsez 1300 ukrainalı balanı qunaq itüe öçen qanäğat’lek kiçerüen äytte häm maxsus qarawğa moxtac yaqınça 200 sabıynıñ da êvakuaśiyälänep Türkiyägä kiterelüe mäs’äläsendä yärdäm soradı.

Zelenska ilbaşı Ärdoğannıñ köçle liderlığı häm diplomatiyäse näticäsendä aşlıq koridorı açıluı häm Rusiyä belän äsir almaşu tormışqa aşırıluın, bigräk tä aşlıq koridorınıñ dön’yanı zur azıq-tölek krizisınnan qotqaruın assızıqladı.  

Fyerst-ledi suğış säbäple sälamätlek tarmağında ixtiyaclarnıñ artuına iğ’tibar cälep itep aşığıç yärdäm häm inkubatorlar mäs’äläsendä Äminä Ärdoğannan yärdäm soradı.

Äminä Ärdoğan isä Twitter akkuntındağı yazmasında bolay dide: “Ukraina däwlät başlığınıñ xatını, qıymmätle dustım Olena Zelenska xanımnı İstanbulda qabul itüemä şatmın. Suğış qorbanı bulğan xatın-qızlar häm balalardan başlap Ukraina xalqınıñ yaraların bergäläşep bäyläyäçägebezgä ışanam. Türkiyä, prośessnıñ başındağı şikelle ük, tınıçlıqqa nigez salu öçen diplomatik köräşen här mäydanda alıp baraçaq”.