5nçe İslam teläktäşlek uyınnarı açıldı

Törkiyäneñ Kon’ya şähärendä 5nçe İslam teläktäşlek uyınnarı başlandı. Anı kiçä kiç ilbaşı Räcäp Tayyip Ärdoğan açtı.  

Çarağa bik küp illärneñ citäkçeläre häm xökümät başlıqları kilde. Ärdoğan tantananı Azärbaycan ilbaşı İlham Äliyev, Tön’yaq Kipr Törek cömhüriyäte liderı Ärsin Tatar, Fälästin xökümäte räise Möxämmät İştiyä, Albaniya prem’yer-ministrı Êdi Rama, Aljir başministrı Äymän bin Abdurraxman, İslam teläktäşlege sport federaśiyäse räise, prinś Abdülğaziz bin Türki Al Faysal Al Suud belän bergä qaradı.  

Törkiyä ilbaşı üz çığışın bismilla äytep başladı. “5nçe İslam teläktäşlek uyınnarı sport çaraların başlap cibäräm. Barlıq tırışlıq quyuçılarnı üzem häm xalqım isemennän täbrik itäm. Xäyerle bulsın!”-dide ul.

Açılışta Qor’än süräläre uqıldı. Protokol äğ’zaları stadionğa kerügä Törkiyä gimnı yañğıradı häm bayraq kütärelde. Şunnan soñ alfavit buyınça uyınnarda qatnaşuçı illärneñ kolonnaları bayraqların kütärep kerde. Uyınnarda 56 ildän barlığı 4 meñ 200 tiräse sportçı yarışaçaq.

Açılış tantanasında İslam dön’yasınıñ tanılğan muzıkantı Maxer Zain çığış yasadı. Monnan tış, milli biyülär tamaşası zur qızıqsınu uyattı.