AQŞ aşlıq kileşüe öçen qanäğat'
Däwlät departamentınnan Törkiyägä maqtaw belderelde
AQŞ Törkiyädä imzalanaçaq Ukrainadan aşlıq çığaru kileşüe öçen qanäğat’ buluın belderde. İlneñ däwlät departamentı süzçese Ned Prays köndälek matbuğat brifingında bolay dip söyläde: “Bu kileşüne şatlanıp qarşı alabız. BMO ğomum särqatibeneñ tığız êşçänlege maqtawğa layıq. Törek berlektäşlärebezneñ andağı tırışlıqların alqışlıybız”.
Prays monıñ barı AQŞ qına tügel, barlıq G20 illäre telägän kileşü buluın da äytte. Ul Rusiyäne azıq-tölekne qoral bularaq qullanuda ğayepläde. Süzçe äytüençä, böten dön’ya dürt küz belän kötüce aşlıqnı çığarttırmıyça totqan öçen Mäskäw idaräse cawap birergä tiyeş.
Bügen İstanbulda Törkiyä ilbaşı Räcäp Tayyip Ärdoğan, BMO ğomum särqatibe Antonio Guterriş, Ukraina häm Rusiyä wäqalätleläre qatnaşında Ukraina portlarınnan aşlıqnı çığaru kileşüe imzalanaçaq.
