“Ber tönne kötmägändä qarşılarına çığarbız”

Törkiyä ilbaşı Räcäp Tayyip Ärdoğan Azärbaycanğa säfärennän qaytışlıy oçqıçta jurnalistlarğa belderülär yasadı, sorawlarğa cawap birde.  

Ul Süriyäneñ tön’yağınnan Törkiyägä yasalırğa mömkin iñ keçkenä höcümne cawapsız qaldırmayaçaqların belderde.

“Süriyäneñ tön’yağında mäğ’lüm terrorçı oyışmalarınıñ koordinaśiyä noqtaları bar. Alar Süriyäneñ tön’yaq-könçığışınnan tön’yaq-könbatışına qadär barlıq ul töbäklärdä bar. AQŞtan başlap barlıq koaliśiyä köçläre, qızğanıçqa, bu terrorçı oyışmalarına citdi külämdä qoral, texnika, kiräk-yaraq belän yärdäm itä häm bu äle dä bara,”-dip söyläde ilbaşı. Ul AQŞnıñ PKK, YPG, PYDgä meñnärçä yök maşinası yärdäm cibärüen söyläde.

“Xätta alar öçen öyränülär dä uzdıralar,-dip däwam itte Ärdoğan.- Xäzer bu çınbarlıq küz aldında torğanda bez kürmämeşkä salışıyqmı? Ğıyraqnıñ tön’yağında PKK häm anıñ däwamçılarına qarşı niçek operaśiyälär uzdırsaq, şul uq xäl Süriyä öçen tağın da döres, tağın da ähämiyätle”.

“Härwaqıt äytkänem şikelle – ber tönne kötmägändä alarnıñ da qarşılarına çığarbız, moña mäcbürbez,”-dide Törkiyä ilbaşı. Ul terrorçılarnıñ şähitlär öçen cawap biräçägen assızıqladı. “İke köndä yaqınça 30 tiräse terrorçınıñ êşen beterdek. Terrorçılıq häm terrorçılarnıñ tamırın qazıp çığaraçaqbız,”-dip söyläde Ärdoğan.