Törkiyädän İranğa “qom-tuzan buranı” cawabı
Törkiyä üz cirlärendäge boyälärneň qom häm tuzan burannarına säbäp buluı raslawlarınıň fännilektän yıraq buluın belderde
Tışqı êşlär ministrlığı süzçese, tulı wäqalätle ilçe Tanju Bilgiç İrannıň “Törkiyä böyäläreneň tuzan häm qom burannarına säbäp buluı” turındağı açıqlawlarına cawap birde.
Belderüendä: "İranda soňğı waqıtta barlıqqa kilgän qom häm tuzan burannarı arqasındağı êkologik problemalarğa häm başqala Tähranda iň yuğarı däräcägä citkän hawa pıçranuına bez tözegän böyälärneň säbäp buluı turındağı raslawlar İran mediasında kiň räweştä yaqtırtıla, mäs’älä säyäsmännär tarafınnan da telgä alına”, - dip äytüçe Tanju Bilgiç:
"Törkiyädäge böyälärneň geografiyabızda qom häm tuzan burannarına säbäp buluı turındağı raslawlar ğıylemlektän yıraq. Qom häm tuzan burannarı kübesençä tabiğıy küreneş häm bu böten dairälär tarafınnan qabul itelä.
Törkiyägä häm İranğa täêsir itkän qom häm tuzan burannarınıň töp säbäbe dönyadağı iň möhim ike tuzan çığanağı bulğan Afrika häm Yaqın Könçığış çül tuzannarı. Nigezdä bu burannarnı klimat üzgäreşläre arqasındağı cirneň bozıluı, urmannarnıň kiselüe, çülläşü häm qorılıq ta arttıra”, - dip belderde.
Bilgiç: "İlebez bügengä qadär tübän diňgez illäreneň ixtıyaclarına iğ’tibar itüçe häm xalıqara xoquqqa ixtiramlı aňlayış belän xäräkät itkän, monnan soň da şuşı aňlayışnı däwam itteräçäk. Törkiyä bu mäs’älä belän bäyle bularaq İran belän raśional’ häm fänni härtörle xezmättäşlekkä açıq”, - dip bilgeläp uzdı.
