Ärdoğan: “Soğud Ğäräbstanı belän yaña çornıñ işekläre açılaçaq”

İlbaşı Ärdoğan sośial’ media akkauntlarınnan urtaqlaşqan yazmasında, Soğud Ğäräbstanı Patşası Selman bin Abdülaziz Al Suudnıñ qunağı bularaq Soğud Ğäräbstanına kilüen iskärtep:

"Hadimü'l Harämäynnıñ çaqıruı belän Soğud Ğäräbstanına säfär yasadıq. Tarixi, mädäni, humanitar bağlanışlarğa iyä ike qardäş il bularaq arabızdağı härtörle säyäsi, xärbi, iq’tisadi êlemtälärneñ arttırıluı häm yaña çornıñ başlanuı öçen tırışabız”, - dip belderde.

Soğud Ğäräbstanı belän Törkiyä arasındağı xezmättäşlekkä dä tuqtalıp uzuçı İlbaşı Ärdoğan bolay dip äytte:

"Soğud Ğäräbstanı belän sälamätlek saqlaw, ênergetika, azıq-tölek iminlege, awıl xucalığı texnologiyaları, saqlanu sänäğäte, finans kebek ölkälärdä xezmättäşlegebezne arttırunıñ bezneñ urtaq mänfäğätlärebezgä buluına ışanabız. Yañartıla alınğan häm çista ênergiya texnologiyaları ölkäsendä citdi potenśialıbıznıñ buluın küräbez. Farsı qultığındağı qardäşlärebezneñ totrıqlılığına häm iminlegenä üz totrıqlılığıbız häm qurqınıçsızlığıbız qadär bez ähämiyät birüebezne här forsatta telgä alabız.

Terrorçılıqnıñ här törlesenä qarşı buluıbıznı häm töbägebezdäge illär belän terrorğa qarşı xezmättäşlekkä bez birgän ähämiyätne iskärtep uzabız. Mönäsäbätlärebezne här ölkädä tağın da kübräk üsteräçägebezgä ışanam. Rabbıbıznıñ yarlıqawı, kiçerüe häm şäfqate küñellärebezne çolğap alğan möbaräk ramazan ayındağı bu säyäxätebez dus häm qardäş Soğud Ğäräbstanı belän yaña çornıñ işeklären açaçaq."

Atnakiçen kiçke säğätlärdä Ciddä qalasına kilgän İlbaşı Ärdoğan Patşa Sälman tarafınnan räsmi tantana belän qarşı alınğan ide.

Qarşı alu tantanasınnan soñ İlbaşı Ärdoğan häm Patşa Sälman matbuğatqa yabıq uzdırılğan qara-qarşı söyläşüdän soñ kiçke aş mäclesenä uzğannar ide.

Ärdoğan soñınnan täxet warisı prinś Sälman belän küreşep söyläşkän ide.

Al-Salam sarayındağı oçraşu matbuğatqa yabıq uzğan ide.

Ärdoğan Soğud Ğäräbstanına kitär aldınnan yasağan belderüendä biredäge oçraşuları waqıtında Törkiyä-Soğud Ğäräbstanı arasındağı mönäsäbätlärne böten yaqları belän küzdän kiçeräçäklären, xezmättäşlekne üsterüneñ mömkinleklären qarap çığaçaqların äytkän ide.