Terrorçılıqqa qarşı köräş tuqtamıy

Törek qorallı köçläre Ğıyraqnıñ tön’yağında Metina, Zap häm Avaşin-Basyan töbäklärendäge terrorçılarğa cir öste häm hawadan Pençe Kilit operaŝiyasen başlattı.

Saqlanu ministrı Xulusi Akar operaŝiya xaqında açıqlaw yasap, xäzerge waqıtta planlanğan maqsatlarnıñ barısınıñ da çınğa aşırıluın, terrorçılar qullanğan sıyınu urınnarı, tunnel’, depolar, mäğarälär belän güyä ştablarınıñ uñışlı räweştä yuqqa çığarıluın, 19 terrorçınıñ täêsirsez xälgä kiterelüen belderde.

Ministr Akar mäydandağı soñğı wazğıyät’ belän bäyle mäğlümat aldı, xäräkättä qatnaşuçı berleklärneñ citäkçeläre belän video konferenŝiya cıyılışı ütkärde.

“Ğıyraqnıñ tön’yağınnan xalqıbızğa häm iminlek köçlärebezgä qarata terror höcümnären yuqqa çığaru häm çik buyı iminlegebezne urnaştıru maqsatı belän Törek qorallı köçlärebez terrorçılarğa qarşı bügen tönlä Pençe Kilit operaŝiyasen başlattı,” – dide ul.

Operaŝiya qısalarında terror oyışmasına bäyle urınnarğa utnıñ açıluın beldergän ministr Akar tübändägeçä cikerde: “Näticä bularaq 40 yıl buyı ilebezne tınıçsız itüçe terror bälasınnan qotqaru mäs’äläsendä täwäkkäl bez. Soñğı terrorçı yuqqa çığarılğanğa qadär köräşebez däwam itäçäk. Terror oyışmasınıñ äkrenläp tarqaluın küräbez. Barlıq bu êşçänleklärebez dus häm qardäş il bulğan Ğıyraqnıñ möstäqıyl’lek xaqları häm cir bötenlegenä xörmät kürsätelep çınğa aşırıla. Qabatlap uzarğa telim, bezneñ berdänber maqsatıbız – terrorçılar. Watandaşlar, tirä-yaq moxit, mädäni häm dini qorılmalarnıñ zıyan kürmäwe öçen zur tırışlıq quyıla.”

İlbaşı idaräseneñ Êlemtä räislege başlığı Faxrettin Altun soŝial’ mediada açıqlaw yasap, terrorçılıqqa qarşı köräş qısalarında başlatılğan Pençe Kilit operaŝiyasendä terror oyalarınıñ yuqqa çığarıluın häm terrornı xuplawçılarğa da forsat birmäyäçäklären citkerde.

İlbaşı idaräse süzçese İbrahim Kalın tübändäge açıqlawnı yasadı: “Pençe Kilit operaŝiyase duslarğa ışanıç, doşmanğa qurqu birä. Bayrağıbızğa yawız küzlärneñ gülägäse töşä almayaçaq. Allaxı Täğalä xärbilärebezne qabat ciñügä ireştersen.”