“AQŞ belän mönäsäbätlär ike yaqlı mänfäğät nigezendä üsterelä alına”

Qalın Amerika Quşma Ştatları Kongress äğ’zaläre belän İstanbulda İlbaşı idaräseneñ Dolmabahçä êş ofisında oçraştı.

Oçraşu waqıtında Rusiyä-Ukraina suğışı belän bergä Süriyä, Azärbaycan, Ärmänstan, İzrail kebek regional’ mäs’älälär quzğatıldı, ênergetika iminlege, saqlanu xezmättäşlege, ike yaqlı säyäsi häm iq’tisadi mönäsäbätlär bäyälände.

Oçraşu aldınnan AQŞ Kongress äğ’zalärenä möräcäğät itüçe Qalın, törek-amerikan mönäsäbätläreneñ tirän tamırlı buluına tuqtalıp uzıp, mönäsäbätlärneñ İkençe Bötendönya suğışınnan soñ Törkiyäneñ NATO äğ’zase buluı belän tağın da köçäyüen häm bügengä qadär strategik berlektäşlek qısalarında däwam itüen belderde.

Qalın, qayber mäs’älälärdäge fiker ayırımlılıqlarına qaramastan xäzerge mönäsäbätlärdä dä strategik xezmättäşlekneñ häm mänfäğätneñ alğı planğa çığuın äytep, AQŞ däwlät departanmentı kiñäşçese Viktoria Nulandnıñ Törkiyä säfäre belän yaña strategik dialog mexanizmın başlatudan qanäğät buluların iskärtep uzdı.

Süzçe Qalın: "Törek-amerikan mönäsäbätlären ike yaqlı mänfäğät häm xörmät nigezendä üsterä alabız”, - dide.

İke il urtaq säwdä külämeneñ 30 milliard dollarğa yaqın buluın belderüçe Qalın fäqät monıñ citärle bulmawın, maqsatnıñ 100 milliard dollar buluına basım yasadı.

24nçe fevral’dä Rusiyäneñ Ukrainağa iğ’lan itkän suğışnıñ küp närsäne üzgärtüen belderüçe Qalın: "Yaña çorğa, salqın suğışqa keräbez, kiläçäktäge yoğıntılarına äzerlänergä tiyışbez. Azıq-tölek, ênergetika, kiber iminlek häm şaqtıy ölkädä bez äzerlänergä tiyış”, - dip äytte.

Suğışnı beterü öçen taraflarnı Antaliyada häm İstanbulda ike möhim cıyılışta qabul itülären xäterlätüçe Qalın söyläşülärdän soñ ömetle buluların, läkin xäzerge waqıtta wazğıyätneñ çağıştırmaça awırlaşuın citkerde.

Süzçe Qalın äle dä ike tarafnı söyläşülär östälenä utırtu öçen quldan kilgänne yasawlarına basım yasadı.

AQŞ senatorı Riçard Şelbiy dä: "Törkiyä – Amerika Quşma Ştatları öçen bik möhim dus häm bu duslıqnı säwdä, diplomatik häm xärbi mönäsäbätlär cähätennän yaqlaw öçen bez biredä. Törkiyä uzğan çorlarda häm bügenge köndä NATOnıñ tuğrılıqlı äğ’zase. Bu bez xörmät itkän wazğıyät”, - dip äytte.